އަހަރު ނިމުނު އިރު އެންޓި ކޮރަޕްޝަން ކޮމިޝަން (އޭސީސީ) ގައި ތަހުގީގު ނުނިމި 999 މައްސަލަ ހުރިކަން އެ ކޮމިޝަނުގެ އަހަރީ ރިޕޯޓުން ހާމަވެއްޖެއެވެ.

އެ ކޮމިޝަނުން ވަނީ މިދިޔަ އަހަރުގެ އަހަރީ ރިޕޯޓް އިއްޔެ އާންމުކޮށްފައެވެ.

މިދިޔަ އަހަރު އެންޓި ކޮރަޕްޝަން ކޮމިޝަން (އޭސީސީ) އިން 358 މައްސަލަ ވަނީ ނިންމާފައެވެ.

މި ރިޕޯޓުން ދައްކާ ގޮތުން އެ ކޮމިޝަނުން ވަނީ މިދިޔަ އަހަރު ތަހުޤީޤު މަރުހަލާއިން 220 މައްސަލަ ނިންމާފައެވެ.

އަދި އަހަރު ނިމުނު އިރު ތަހުގީގު މަރުހަލާއިން ނުނިމި 999 މައްސަލައެއްވާކަން ވެސް ރިޕޯޓުން ދައްކައެވެ.

ޕްރިލިމިނަރީ ތަހުގީގު މަރުހަލާ އިން ކޮރަޕްޝަންގެ އަމަލެއް ނެތް ކަމަށް 138 މައްސަލަ ނިންމާފައިވާއިރު ޕްރިލިމިނަރީ ތަހުގީގު މަރުހަލާއިން 786 މައްސަލަ ވަނީ ނުނިމިކަން ފާހަގަކޮށްލެވެއެވެ.

އޭސީސީއިން ތަހުގީގު ނިންމި މައްސަލަތަކުގެ ތެރެއިން ދައުވާ ކުރަން ފެންނަ ކަމަށް ނިންމައި މިދިޔަ އަހަރު ޕީޖީ އޮފީހަށް ފޮނުވާފައިވަނީ 18 މައްސަލައެކެވެ.

މިދިޔަ އަހަރު ޖުމްލަ 39 އިދާރާއަކުން އިސްލާހު ކުރަން ޖެހޭ ކަންކަން ވެސް އޭސީސީން ވަނީ އަންގާފައެވެ.

އަދި އެކޮމިޝަނުން ހިންގި ހޭލުންތެރިކުރުވުމުގެ ސެޝަންގައި 2508 މީހަކު ވަނީ ބައިވެރިވެފައެވެ.

ކޮރަޕްޝަނާ މެދު އާންމުންދެކޭ ގޮތާއި އެކަމަށް ދިވެހިން ހޭލުންތެރިވެފައިވާ މިންވަރު ދެނެގަތުމަށް ޓަކައި ގައުމީ ފެންވަރުގައި ހަދާފައިވާ ދިރާސާއެއްގެ ނަތީޖާ އެ ކޮމިޝަނުން މިދިޔަ އަހަރު އާންމުކޮށްފައެވެ.

މި ދިރާސާގައި ޖުމްލަ 722 މީހުންނާއި ފޯން އިންޓަވިއު ވަނީ ނަގާފައެވެ. އޭގެތެރޭގައި 51 އިންސައްތަ އަކީ ފިރިހެނުންނެވެ.

އޭސީސީން ބުނާގޮތުން މި ދިރާސާގައި ރާއްޖޭގެ އުތުރުން 18 އިންސައްތަ މީހުން ބައިވެރިވެފައިވާއިރު މެދު ރާއްޖެ ތެރެއިން ބައިވެރިވީ 17 އިންސައްތަ މީހުންނެވެ. އަދި ދެކުނުން ބައިވެރިވި 22 އިންސައްތަ މީހުންގެ އިތުރުން މާލޭ ސަރަހައްދުން ވަނީ 43 އިންސައްތަ މީހުން ބައިވެރިވެފައެވެ.