ޕީއެންއެފްގެ ސެކްރަޓަރީ ޖެނެރަލް މަލީހް ޖަމާލް އެކްސްގައި ކުރެއްވި ޕޯސްޓެއްގައި ސަރުކާރަށާއި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ވަރަށް ބޮޑަށް ފާޑުވިދާޅުވެއްޖެއެވެ.
މަލީހްގެ ޕޯސްޓުގައި ބަޔާންކުރައްވާފައިވަނީ، ޕީޕީއެމްގެ ގިނަ އަދަދެއްގެ މެމްބަރުން އެ މެމްބަރުންނަށް ނޭނގި ޕީއެންސީގެ ދަފުތަރަށް ބަދަލުކޮށްފައިވާއިރު މިއީ އިލެކްޝަންސް ކޮމިޝަނުން ޒިންމާދާރުކަމާއެކު ބަލަންޖެހޭނެ ކަމެއް ކަމަށާއި، މިކަން އަވަހަށް ބަލައި ފިޔަވަޅު އެޅުމަށް މަލީހް ވަނީ ގޮވާލައްވާފައެވެ.
މީގެ އިތުރުން، ރައީސް މުޢިއްޒު އަމިއްލަފުޅަށް އިސްތިއުފާ ނުދެއްވާނަމަ، ރައްޔިތުން އެމަނިކުފާނުގެ ވެރިކަން ބޭނުންވޭތޯ ބެލުމަށްޓަކައި "ފެންނަ ނުފެންނަ" ވޯޓަކަށް ދާންޖެހޭ ކަމަށްވެސް މަލީހް ވިދާޅުވިއެވެ. މަލީހް އިތުރަށް ވިދާޅުވީ، ރައްޔިތުންގެ ތާއީދު އޮތް މިންވަރު މިފަދަ ވޯޓަކުން ސާފުވާންޖެހޭނެ ކަމަށެވެ.
މި ފާޑުކިޔުންތައް އަމާޒުވެފައިވަނީ ސަރުކާރު ހިންގާ މައި ޕާޓީ އިއްޔެ ނެގުނު އިންތިޚާބުތަކުން ބޮޑު ތަނުން ބަލިވެފައިވާ ދަނޑިވަޅެއްގައެވެ.
