އެމެރިކާގެ ރައީސް ޑޮނަލްޑް ޓްރަމްޕް، އީރާނުގެ މުހިންމު އިންފްރާސްޓްރަކްޗާތަކަށް އަމާޒުކޮށް ވަރުގަދަ ހަމަލާތަކެއް ދޭނެ ކަމުގެ އިންޒާރު ދެއްވައިފިއެވެ. ޓްރަމްޕް ވިދާޅުވީ އީރާނުން ބަންދުކޮށްފައިވާ ސްޓްރޭޓް އޮފް ހޮރްމުޒް (ހޮރްމުޒް ކަނޑުއޮޅި) ކުރިއަށް އޮތް އަންގާރަ ދުވަހުގެ ކުރިން އަލުން ނުހުޅުވައިފިނަމަ، އެގައުމަށް "ނަރަކަ" އަށް ހަދާލާނެ ކަމަށެވެ.
ޓްރަމްޕްގެ މި ހަރުކަށި ބަޔާނުގައި ބުނެފައިވަނީ، އީރާނުގެ ޕަވަރ ޕްލާންޓްތަކާއި ބްރިޖްތަކަކީ އެމެރިކާގެ އަމާޒުފަތްތަކެއް ކަމަށެވެ. މިއީ ބައިނަލްއަގުވާމީ މަސްރަހުގައި ނުތަނަވަސްކަން އިތުރުކޮށް، ސަރަހައްދީ ހަމަޖެހުމަށް ބުރޫއަރާފަދަ ނުރައްކާތެރި އިންޒާރެއްގެ ގޮތުގައި ގިނަ ބަޔަކު ދެކެއެވެ.
ޓްރަމްޕްގެ މި އިންޒާރާ ގުޅިގެން އީރާނުން ވަނީ ވަގުތުން ރައްދު ދީފައެވެ. އީރާނުގެ ސަރުކާރުން ބުނެފައިވަނީ އެގައުމުގެ އެއްވެސް އިންފްރާސްޓްރަކްޗާއަކަށް ނުވަތަ ތަނަކަށް އެމެރިކާއިން ހަމަލާއެއް ދީފިނަމަ، އޭގެ ބަދަލު ހަމަ އެފަދަ ގޮތަކަށް ހިފާނެ ކަމަށެވެ.
ދުނިޔޭގެ ތެލުގެ ވިޔަފާރީގައި މުހިންމު ދައުރެއް އަދާކުރާ ހޮރްމުޒް ކަނޑުއޮޅީގެ މައްސަލައިގައި ޓްރަމްޕް މިފަދަ ހަރުކަށި އިންޒާރެއް ދެއްވުމުން، މިއީ ހަމަނުޖެހުމަކަށް މަގުފަހިވާނެ އަމަލެއްގެ ގޮތުގައި މުހައްލިލުން ފާހަގަކުރެއެވެ.
