ރައްޔިތުންގެ މަޖިލީހުގެ އިންތިހާބުގައި ވޯޓުލުމަށް ރީ-ރެޖިސްޓްރޭޝަނަށް ހުޅުވާލުމުން މިހާތަނަށް 5،000 އަށްވުރެ ގިނަ ފަރާތްތަކުން ރީ-ރެޖިސްޓްރީ ވުމަށް ހުށަހަޅާފައިވާ ކަމަށް އިލެކްޝަންސް ކޮމިޝަނުން ހާމަކޮށްފިއެވެ.

އީސީގެ ތަފާސް ހިސާބުތަކުން ހާމަވާ ގޮތުގައި، ރީ-ރަޖިސްޓްރޭޝަނަށް އެދި 5،202 ފަރާތަކުން ފޯމު ހުށަހަޅާފައިވާއިރު 4،718 މީހުން މިހާރު ވަނީ ރަޖިސްޓްރީކޮށްދީފައެވެ. އަދި 484 އެޕްލިކޭޝަންއެއް ރިޖެކްޓު ކުރެވުނު ކަމަށް އީސީން ވިދާޅުވިއެވެ.

މިހާތަނަށް ރީ-ރެޖިސްޓްރޭޝަނަށް ހުށަހަޅާފައިވަނީ:

• އިންޑިއާއަށް 50 މީހުން،

• މެލޭޝިއާއަށް 463 މީހުން،

• ސްރީލަންކާއަށް 241 މީހުން،

• ތައިލޭންޑްއަށް 7 މީހުން،

• އިނގިރޭސިވިލާތަށް 52 މީހުން

• ޔޫއޭއީއަށް 14 މީހުން ރަޖިސްޓްރީ ވާން ވަނީ އެދިފައެވެ.

މިމަހުގެ 16 ވަނަ ދުވަހުގެ ނިޔަލަށް ރީ-ރެޖިސްޓްރީ ވާން ފުރުސަތު އީސީއިން ހުޅުވާލާފައިވެއެވެ.

ރީ-ރަޖިސްޓްރީ ކުރަން ޖެހޭނީ މީގެ ކުރިން ވޯޓުލާން ރަޖިސްޓްރީ ކުރި ތަން ނޫން އެހެން ތަނެއްގައި ވޯޓުލާނަމައެވެ. އޮންލައިންކޮށް ވެސް ރީ-ރެޖިސްޓަރ ކުރެވޭނެ އިންތިޒާމުވެސް ވަނި ހަމަޖައްސާފައެވެ.

އީސީއިން ކަނޑައަޅާފައިވާ ގޮތުން ވޯޓުފޮށި ބަހައްޓާނީ 150 އަށްވުރެ ގިނަ މީހުން ރީ ރަޖިސްޓްރިވާ ގައުމުތަކުގައި އެކަނިއެވެ.

އަދި ރިސޯޓުތަކުގައި ވޯޓު ފޮށި ބަހައްޓާނީ 30 އަށްވުރެ ގިނަ އަދަދަކަށް ރީރަޖިސްޓްރީވާ ރިސޯޓުތަކުގައި އެކަނިކަމަށްވެސް އީސީން ވަނީ ބުނެފައެވެ.

އީސީއިން ހާމަކޮށްފައިވާ ގޮތުގައި ރީރެޖިސްޓްރޭޝަންއަށް ފަހު، ކުރިން ވޯޓުފޮށިތައް ނުބެހެއްޓުނު ތަންތަނުގައި ވޯޓު ފޮށިތައް ބެހެއްޓުމުގެ ފުރުސަތު އެބަ އޮތް ކަމަށެވެ.