ރައީސް އަބްދުﷲ ޔާމީން އަބްދުލްގައްޔޫމަށް ޢައްދާރުވި ބަޔަކަށް އެއްވެސް ވަރަކަށް އިތުބާރު ނުކުރެވޭނެ ކަމަށް އެމަނިކުފާނުގެ އިސް ޤާނޫނީ ވަކީލް ޑރ.މުހައްމަދު ޖަމީލް އަހްމަދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ޑރ.ޖަމީލް ވިދާޅުވީ މިއަދު ސަރުކާރުގެ އިސް ފަނޑީގައި ތިއްބެވި ބޭފުޅުން ރައީސް ޔާމީންގެ މުޅި ހަޔާތްޕުޅަށް ޢައްދާރުވިކަަމަށެވެ.
އެހެންކަމުން އެބަޔަކަށް ރައްޔިތުން ކުރާނީ ކޮން އިތުބާރެއްތޯއޭވެސް ޑރ.ޖަމީލް ވަނީ ވިދާޅުވެ ސުވާލު އުފައްދާފައެވެ.
ޕީޕީއެމް/ޕީއެންސީގެ ލީޑަޝިޕުގެ އެއްްވެސް ލަދެއްވެސް ނެތީތޯ ޑރ.ޖަމީލް ވަނީ އެކްސްގެ އެ ޕޯސްޓްގައި ސުވާލު އުފައްދާފައެވެ.
މާލޭ ސިޓީ އަދި މުޅި ދިވެހިރާއްޖޭގެ ރައްޔިތުންނަށްވެސް ސްޕެޝަލް އެޑްވައިޒަރ އަބްދުލްރަހީމް އަބްދުﷲ އަދި ރައީސް ޑރ.މުހައްމަދު މުއިއްޒު ދަސްވެއްޖެ ކަމަށާއި އެބޭފުޅުންގެ ދޮގުވެރިކަމާއި މަކަރުވެރިކަން އިންތިޚާ ކަމަށްވެސް ޑރ.ޖަމީލް ވަނީ ޕޯސްޓްގައި ފާހަގަކުރައްވާފައެވެ.
މިފަދައިން ވިދާޅުވެފައިވާއިރު ޑރ.ޖަމީލް ވަނީ ވިޑިޔޯއެއްވެސް ޕޯސްޓްގައި ހިއްސާކުރައްވާފައެވެ. އެ ވީޑިޔޯއިން ފެނިގެންދަނީ މިހާރު ސަރުކާރުގެ އިސް ފަނޑީގައި ތިއްބެވި ބޭފުޅުން ރައީސް ޔާމީންގެ ފަހަތްޕުޅުގައި ހުންނަވާނަމޭ ވިދާޅުވާ މަންޒަރެވެ.
ސަރުކާރުން ރައީސް ޔާމީނާ ދޭތެރޭ ކަންތައް ކުރައްވަމުން ގެންދަވާ ގޮތާއިމެދު ގިނަ ބަޔަކު އަންނަނީ ހިތްހަމަ ނުޖެހުން ފާޅުކުރައްވަމުންނެވެ.
