ނ. ކެނދިކުޅުދޫ ކައުންސިލުން، ރައީސް ޑރ. މުހައްމަދު މުއިއްޒަށް އަމާޒުކުރި ކޮރަޕްޝަންގެ ތުހުމަތުތައް މި ސަރުކާރުން ތަހުގީގުކޮށްފާނެ ކަމާ މެދު ރައީސް އަބްދުﷲ ޔާމީން ސުވާލު އުފައްދަވައިފިއެވެ.

ދަ ފްރޮންޓް އޮފީހުގައި އޮތް ޖަލްސާއެއްގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ ކެނދިކުޅުދޫ ކައުންސިލުން ނެރުނު ބަޔާނަކީ ނުނެރެވޭނެ ބަޔާނެއް ކަމަށް ނިންމާ އެ ބަޔާން ނެގުމަށް އެލްޖީއޭ މިނިސްޓްރީއިން އެންގި ނަމަވެސް އެ އެންގުން ނޭންގޭނެ ކަމަށް ދައުލަތުގެ ބަންޑާރަ ނައިބު ވިދާޅުވުމުން އެނގިގެން ދަނީ ކައުންސިލަށް ބަޔާން ނެރުމުގެ ބާރު އޮތްކަން ކަމަށާ ނަމަވެސް ސުވާލަކީ އެ ތުހުމަތުތައް ތަހުގީގުކޮށް ބަލަން ސަރުކާރަށް ކެރިދާނެތޯ ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން އިތުރަށް ވިދާޅުވީ، ކައުންސިލްތައް ބާރުވެރިކުރުވުމަކީ އަބަދުވެސް އެމަނިކުފާނު ތާއީދުކުރައްވާ ތަރުހީބު ދެއްވާ ކަމެއް ކަމަށެވެ.

ރައީސް ޔާމީން މިފަދައިން ވިދާޅުވެފައި މިވަނީ ދައުލަތުގެ ވަސީލަތްތަކުގެ ބޭނުން ނަހަމަ ގޮތުގައި ހިފާ، ރަަސްމީ ދަތުރުފުޅުގެ ނަމުގައި ރައީސް މުއިއްޒު ކެމްޕޭނު ހަރަކާތްތައް ހިންގަވާ ކަމަށް ބުނެ ކެނދިކުޅުދޫ ކައުންސިލްގެ ބޮޑު ތުހުމަތުތަކެއް ރައީސް މުއިއްޒަށް އަމާޒުކުރައްވާފައިވާ ދަނޑިވަޅެއްގައެވެ.