މަޖިލީހުގެ އިންތިހާބުގައި ރީ-ރެޖިސްޓްރީ ކުރުމަށް ހުޅުވާލި ފުރުސަތުގައި މިހާތަނަށް އެންމެ ގިނައިން ރާއްޖެއިން ބޭރަށް ރީ-ރެޖިސްޓްރީކޮށްފައި ވަނީ މެލޭޝިއާ އަށް ކަމަށް އިލެކްޝަންސް ކޮމިޝަން(އީސީ)އިން ހާމަކޮށްފިއެވެ.

އީސީއިން އެކްސްގައި އާންމުކުރި ތަފާސް ހިސާބުތަކަށް ބަލާއިރު، ރާއްޖެއިން ބޭރުގައި ބެހެއްޓުމަށް ނިންމާފައިވާ ފޮށިތަކަށް 1،073 މީހަކު މިހާތަނަށް ރީ-ރެޖިސްޓަރ ކޮށްފައިވެއެވެ. އޭގެ ތެރެއިން އެންމެ ގިނައިން މީހުން ރީ-ރެޖިސްޓަރ ކޮށްފައިވަނީ މެލޭޝިއާގައި ބަހައްޓާ ފޮއްޓަށެވެ.

އެގޮތުން މެލޭޝިއާގައި ބަހައްޓާ ފޮއްޓަށް މިހާތަނަށް 583 މީހަކު ރެޖިސްޓަރ ކޮށްފައިވާއިރު ދެން އެންމެ ގިނައިން މީހުން ރެޖިސްޓަރ ކޮށްފައިވަނީ ސްރީލަންކާއަށެވެ. އެއީ 276 މީހުންނެވެ.

މީގެ އިތުރުން އިންޑިއާއަށް 101 މީހަކު ރެޖިސްޓަރ ކޮށްފައިވާއިރު އިނގިރޭސި ވިލާތުގެ ލަންޑަނަށް 76 މީހަކު، ޔުނައިޓެޑް އަރަބި އެމިރޭޓްސް (ޔޫއޭއީ) އަށް 24 މީހަކު އަދި ތައިލެންޑަށް 13 މީހަކު ވަނީ ރެޖިސްޓަރކޮށްފައެވެ.

ވޯޓުލާން ރަޖިސްޓަރީވެފައިވާ ރަށް ނޫން އެހެން ތަނެއްގައި ވޯޓުލުމަށްޓަކައި ރަޖިސްޓަރީވުމުގެ ފުރުސަތު މިއަދު މެންދުރުފަހު 03:00 ގެ ނިޔަލަށް ހަމަވާނެއެވެ.

ރީ-ރަޖިސްޓަރީވުމަށް އެދި ހުށަހަޅާނީ ރައްޔިތުންގެ މަޖިލީހުގެ އިންތިޚާބުގައި ވޯޓުލުމަށް މިހާރު ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލުމަށް ރަޖިސްޓަރީވާން ބޭނުންވާ ފަރާތްތަކުންނެވެ. މަޖިލީހުގެ އިންތިޚާބުގައި ވޯޓުލުމަށް ރަޖިސްޓަރީވެފައިވާ ތަނުގެ މައުލޫމާތު އީސީގެ ވެބްސައިޓްގެ ޒަރިއްޔާއިން ޗެކްކުރެވޭނެއެވެ.

ރަޖިސްޓަރީ ވުމަށް އެދި ހުށަހަޅާނީ އިލެކްޝަންސް ކޮމިޝަންގެ ރީ-ރަޖިސްޓްރޭޝަން ޕޯޓަލް މެދުވެރިކޮށް އެކަނިއެވެ.