20 ވަނަ ރައްޔިތުންގެ މަޖިލީހުގެ މެޖޯރިޓީ ލިބިއްޖެ ނަމަ، ޅަފަތުގައި ރައީސް ޑރ. މުހައްމަދު މުއިއްޒުގެ ސަރުކާރު ވައްޓާލާނެކަމުގެ އިންޒާރުދީފިއެވެ.

މި އިންޒާރު ދީފައިވަނީ އިދިކޮޅު. މޯލްޑިވިއަން ޑިމޮކްރެޓިކު ޕާޓީ (އެމްޑީޕީ)އިންނެވެ.

އެމްޑީޕީގެ ޗެއަރޕާސަން ފައްޔާޒު އިސްމާއިލް މިފަދައިން އިންޒާރުުދީފައިވަނީ އެމްޑީޕީގެ ކެމްޕޭން ޖަލްސާއެއްގައި ހުކުރު ދުވަހުގެ ރޭ ވާހަކަ ދައްކަމުންނެވެ.

ފައްޔާޒު ބުނެފައިވާ ގޮތުގައި ހަމަމަގުގައި ރާއްޖެ ހިފަހައްޓަން ކުރަން ޖެހޭ ކަންކަން ކުރުމަކީ ސިޔާސީ ޕާޓީއަކަށް ގާނޫނީގޮތުން އޮތް ޒިންމާއެއް ކަމަށެވެ. އަދި މި ސަރުކާރަކީ ދޮގު ހަދައި އޮޅުވާލާއިގެން އައި ސަރުކާރެއް ކަމަށް ތުހުމަތުކޮށް ފައްޔާޒު ބުނީ ގައުމު އަނިޔާވެރި އަދި ފުދުންތެރިކަން ނެތް ގައުމަކަށް ވާން ޖާގަ ދެވެން ނޯންނާނެ ކަމަށެވެ. އަދި އެކަން ހުއްޓުވަން ކުރަން ޖެހޭ ހުރިހާ ކަމެއް ކުރާނެ ކަމަށެވެ.

އެގޮތުން މަޖިލިސް މެޖޯރިޓީ ލިބިގެން މެނުވީ ގައުމު ހަމަމަގަށް ނޭޅުވޭނެ ކަމަށާ މިއީ ނުކިސިޔާރު ސަރުކާރެއް ކަަމަވުމުން މިސްރާބު ރަގަޅު ކުރުމަށް އެމްޑީޕީއަށް މެޖޯރިޓީ ބޭނުންވާ ކަމަށް ފައްޔާޒު ބުނެފައިވެއެވެ.

"މި ދަންނަވަނީ އެއްވެސް ވަރަކަށް ސަރުކާރަށް ޖެއްސުން ކުރާ ވާހަކައެއް ނޫން، ސަރުކާރު ވައްޓާލަން އުޅޭ ވާހަކައެއް ވެސް ނޫން. ވައްޓާލަން ޖެހިއްޖެނަމަ ވައްޓާލާނަން. އެކަމަކު އަޅުގަނޑުމެންނަށް ރައްޔިތުންގެ މަޖިލީސް މެޖޯރިޓީ ލިބިގެން ނޫނީ ވާނުވާ ސަރުކާރު އޮބިއެއް ނޭޅޭނެ،" އޭނާ ވިދާޅުވިއެވެ.