"އަދަދު" ނޫހުން އާންމުކުރި ޑޮކިއުމެންޓްރީއަކާ ގުޅިގެން ފުލުހުން އެ ނޫހުގެ އޮފީހަށް ވަތް މައްސަލާގައި ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ނިސްބަތްކޮށް ތުހުމަތުތަކެއް އަމާޒުކުރެވިގެން ދިޔަ "އައިޝާ" ޑޮކިއުމަންޓްރީއާ ގުޅިގެން "އަދަދު" ނޫހުގެ އޮފީހަށް ފުލުހުން ވަނި ރެއިޑު ޖަހާފައެވެ.
މި މައްސަލައާ ގުޅިގެން މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމު ހުށަހެޅުއްވި މައްސަލާގައި ބުނެފައިވަނީ، ނޫހަކުން އާންމުކުރާ ކޮންޓެންޓަކާ ގުޅިގެން އުފެދޭ ހިޔާލުތަފާތުވުންތައް ބެލުމަށް ގާނޫނީ ހާއްސަ މެކޭނިޒަމެއް އޮންނަ އިރު، އެ އިޖުރާއަތުން ބޭރުވެ ފުލުހުން ގަދަބާރުން ނޫހެއްގެ އޮފީހަށް ވަދެ މުދާ ހިފެހެއްޓުމަކީ ނޫސްވެރިކަމުގެ މިނިވަންކަމަށް އަރައިގަތުން ކަމަށެވެ. އަދި މިއީ އެ ނޫސް ހުއްޓުވުމުގެ ބޭނުމުގައި ހިންގި އަމަލެއް ކަމަށް ތުހުމަތު ކުރުމުގެ ޖާގަ އެބައޮތް ކަމަށްވެސް އޭނާ ފާހަގަކުރެއްވާފައިވެއެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އިއުލާނު ކުރެއްވީ މި މައްސަލައަކީ މަޖިލީހުގެ ގަވައިދަށް ފެތޭ މައްސަލައެއް ނޫން ކަމަށެވެ. އެގޮތުން، ކުއްލި މައްސަލައަކީ ހަގީގަތެއްގެ މައްޗަށް ބިނާވެފައިވާ ކަމަކަށް ވާންޖެހޭނެ ކަމަށް ގަވައިދު ބުނާކަން ރައީސް ފާހަގަކުރެއްވިއެވެ.
މަޖިލީހުގެ ރައީސް ވިދާޅުވީ، ފުލުހުން "އަދަދު" ނޫހުގެ އޮފީހަށް ވަދެފައިވަނީ ކޯޓު އަމުރެއްގެ ދަށުންކަން ފުލުހުން ކަށަވަރުކޮށްދީފައިވާ ކަމަށެވެ. އަދި ކުއްލި މައްސަލައަކީ ގައުމުގެ އާންމު މަސްލަހަތަށް ސީދާ ގޮތުން އަސަރުކުރާ ބޮޑު ކަމެއް ކުއްލިއަކަށް ދިމާވުމުން ހުށަހަޅާ އެއްޗަކަށް ވާންޖެހޭނެ ކަމަށްވެސް އެމަނިކުފާނު ވިދާޅުވިއެވެ. މި މައްސަލަ ބަލައިނުގަތުމަށް ނިންމެވީ މަޖިލީހުގެ ގަވައިދުގެ 197 ވަނަ މާއްދާގެ (ށ)، (ކ) އަދި (ދ) ގައި ބަޔާންކޮށްފައިވާ ޝަރުތުތައް ފުރިހަމަ ނުވާތީ ކަމަށް ރިޔާސަތުން ވަނީ ކަނޑައަޅުއްވާފައެވެ.
