ރަސްމާލޭގެ ނަމުގައި ބިން ހިއްކަމުންދާ މަޝްރޫއުގެ ތެރެއިން ވެސް ބޮޑެތި ވައްކަން ކުރަމުންދާކަމުގެ މައުލުމާތު އެމަނިކުފާނާ ހަމައަށް ލިބިވަޑައިގެންފައިވާ ކަމަށް، ޕީއެންއެފްގެ ރައީސް، ރައީސް އަބްދުﷲ ޔާމީން ވިދާޅުވެއްޖެއެވެ.

ޕީއެންއެފްގެ ޓައުން ހޯލް ޖަލްސާގައި އިންނަވާ އާދިއްތަ ދުވަހުގެރޭ އެމަނިކުފާނު ވިދާޅުވީ، ކ. ފުށިދިއްގަރުފަޅު ހިއްކައިގެން ތަރައްގީކުރާ ރަސްމާލެ  ހިއްކުމުގެ މަސައްކަތް ކުރަން ސަރުކާރާއި ރައްޔިތުން ހިއްސާވާ އެމްޓީސީސީ އިން ހުށަހެޅި ކަމަށާއި އެ ކުންފުނިން ހުށަހެޅި އަގުތައް ގަބޫލުނުކޮށް އެއަށް ވުރެ ބޮޑު އަގުގައި ބޭރުގެ ބަޔަކާ ހަވާލުކޮށްފައިވާ ކަމަށެވެ.

އެގޮތުން ރަސްމާލެއިން ހިއްކާ ކޮންމެ ކޮޑި މީޓަރުން 2 ޑޮލަރުގެ ވައްކަމެއް ކުރާކަމުގެ މައުލޫމާތު ލިބިވަޑައިގެންފައިވާ ކަމަށާ ދިވެހި ކުންފުންޏަކާ ހަވާލުކޮށްގެން އެ މަސައްކަތް ކުރާނަމަ އެ ވައްކަމެއް ނުކުރެވޭނެ ކަމަށްވެސް ރައީސް ޔާމީން ވިދާޅުވިއެވެ.

ރައީސް ޔާމީން ވަނީ އެއީ ފިނޭންސް މިނިސްޓަރާ އަދި އެމްއޭސީއެލްގެ ސިއީއޯވެސް ގުޅިގެން، ރައީސް މުއިއްޒަށް މަންފާ ހޯދައިދިނުމަށް ހިންގާ ޖަރީމާއެއްގެ ގޮތުގައި ސިފަކުރައްވާފައެވެ.

ރައީސް ޔާމީން ވަނީ މިސަރުކާރުން ޕްރޮޖެކުޓުތައް ހިންގުމުގެ ނަމުގައި ވެސް ރައްޔިތުންނަށް ދެނީ ދޯކާ ކަމަށް ވިދާޅުވެފައެވެ.