އިލެކްޝަންސް ކޮމިޝަން (އީސީ)ގެ އައު ވެބްސައިޓް ބޭނުން ކުރަން ފަށައިފިއެވެ.

އީސީން ބުނީ އެ ކޮމިޝަނުގެ މަސައްކަތްތަކާ ގުޅޭ މަޢުލޫމާތު ރައްޔިތުންނަށް ފަސޭހައިން ލިބޭނެގޮތަށް ފަރުމާކޮށްފައިވާ އެ ކޮމިޝަނުގެ އައު ވެބްސައިޓުގެ ޚިދުމަތް މިހާރު ލިބެމުންދާނެ ކަމަށެވެ.

މި ވެބްސައިޓް ފަރުމާ ކޮށްފައިވަނީ ޚަބަރާއި މައުލޫމާތު ފަސޭހައިން އާންމުންނަށް ލިބޭ ގޮތަށް، އެކޮމިޝަންގެ އެންމެ ފަހުގެ މަސައްކަތްތަކުގެ ޚަބަރުތައް ވެސް ލިބޭ ގޮތަށެވެ.

އެ ކޮމިޝަނުން މިހާރު ދަނީ ކުރިޔަށް އޮތް 20 ވަނަ ރައްޔިތުންގެ މަޖިލީހުގެ އިންތިހާބަށް ތައްޔާރީތައް ވަމުންނެވެ.

އެގޮތުން ރޯދައިގެ ފަހަށް އިންތިހާބު ބަދަލުކުރުމާ ގުޅިގެން ރީ-ރެޖިސްޓްރޭޝަން ކަންތައް ކުރުމާއި އިންތިހާބާ ބެހޭ އެހެނިހެން މަސައްކަތްތައް ދަނީ ކުރަމުންނެވެ.

އީސީން ހާމަކުރި ގޮތުގައި މިފަހަރު ރާއްޖޭގެ އިތުރުން ތިން ގައުމެއްގައި ވޯޓުފޮށި ބަހައްޓަން ވަނީ ނިންމާފައެވެ. އެގޮތުން އިންޑިއާ، މެލޭޝިއާ އަދި ލަންކާގެ ކޮލަމްބޯގައި ވޯޓުފޮށި ބެހައްޓާނެއެވެ.

މި ތިން ގައުމުގެ އިތުރުން ތައިލޭންޑް، އިނގިރޭސިވިލާތު އަދި ޔޫއޭއީގައި ވެސް މީހުން ވަނީ ރީ-ރެޖިސްޓާކޮށްފައެވެ. ނަމަވެސް ވޯޓުފޮށި ބެހެއްޓޭ އަދަދަށް ރެޖިސްޓާކޮށްފައި ނުވާތީ އެ ގައުމުތަކުގައި ވޯޓު ފޮށި ނުބަހައްޓައެވެ.