މުސްލިމުންނާ ދެކޮޅަށް ދެމުންދާ ހަމަލާތައް ހުއްޓުވުމަށް ބައިނަލްއަގުވާމީ މުޖްތަމައުތައް ގުޅިގެން މަސައްކަތް ކުރުމަށް ރާއްޖެއިން އދ. ގައި ގޮވާލައިފިއެވެ.

ރާއްޖެއިން އެގޮތަށް ގޮވާލީ، ބައިނަލްއަގުވާމީ ގޮތުން ފާހަގަކުރާ އިސްލާމް ފޯބިއާ އާ ދެކޮޅަށް މަސައްކަތް ކުރުމުގެ ދުވަހާ ގުޅިގެން އދ. ގައި ބޭއްވި މަތީ ފަންތީގެ ބައްދަލުވުމުގައެވެ.

އެ ބައްދަލުވުމުގައި ރާއްޖެއިން ވަނީ އިސްލާމްދީނާ ދެކޮޅު އަމަލުތަށް ޓޮލަރޭޓްނުކުރާ އަދި އިސްލާމުންނާ ދެކޮޅަށް މަސައްކަތް ނުކުރާ މުޖްތަމައުއެއް ބިނާކުރުމަށް ގޮވާލާފައެވެ.

އެގޮތުން ރޯދަ މަހުގައި ވެސް އިސްރާއިލުން ފަލަސްތީނުގެ މުސްލިމުންނާ ދެކޮޅަށް ދެމުންދާ ހަމަލާތައް ރާއްޖެއިން ވަނީ ހަރުކަށި އިބާރާތުން ކުށްވެރިކޮށްފައެވެ.

ފޮރިން މިނިސްޓަރު މޫސާ ޒަމީރު އެކްސްގައި ކުރެއްވި ޕޯސްޓެއްގައި ވިދާޅުވީ އދ. ގެ އެ ހައިލެވެލް އިވެންޓުގައި މުސްލިމުންނަށާއި މުސްލިމް މުޖުތަމައުތަކަށް އަމާޒުކޮށްގެން ދޭ ހަމަލާތައް ހުއްޓާލުމަށް ބައިނަލްއަގުވާމީ ކޮމިއުނިޓީ ގުޅިގެން މަސައްކަތް ކުރުމަށް ރާއްޖެއިން ގޮވާލާފައިވާ ކަމަށެވެ.

އަދި އިސްލާމްފޯބިއާއާ ދެކޮޅަށް އަޅަންޖެހޭ ފިޔަވަޅުތަކާ ބެހޭ ގަރާރުވެސް އެ ބައްދަލުވުމުގައި ރާއްޖެއިން ވަނީ ކޯ ސްޕޮންސާކޮށްފަ އެވެ.

އެ ގަރާރާ އެއްކޮޅަށް 115 ގައުމަކުން ވަނީ ވޯޓު ދީފައެވެ.