އިންޑިއާއިން ރާއްޖެއަށް "ހަދިޔާ"ކޮށްފައި އޮންނަ ކަމަށް ބުނާ ހެލިކޮޕްޓަރުތައް އޮޕަރޭޓުކުރުމަށް މަދަނީ އިންޑިއާ ސިފައިން ބައިތިއްބަން މަޝްވަރާތައްކުރިއަށް ގެންގޮސްފައިވާކަން ހާމަވެއްޖެއެވެ.

މި މަޝްވަރާތައް ކުރިއަށް ގެންގޮސްފައިވަނީ ރާއްޖޭގައި ތިބި އިންޑިއާގެ ސިފައިން އެ ގައުމަށް އަނބުރާ ގެންދިއުމާ ގުޅޭގޮތުން ދެ ގައުމުގެ ދެމެދުގައި ބާއްވާ ސިލްސިލާ ބައްދަލުވުންތަކުގެ މި މަހުގެ 17 ވަނަ ދުވަހު މާލޭގައި ބޭއްވި ހައިލެވެލް ކޯ ގްރޫޕުގެ ތިން ވަނަ މަޝްވަރާ ބައްދަލުވުމުގައެވެ.

އިންޑިއާގެ އެކްސްޗާނަލް މިނިސްޓްރީން އާއްމުކުރި ނޫސް ބަޔާނެއްގައިވާ ގޮތުން އެ ބައްދަލުވުމުގައި ރާއްޖެއަށް އިންސާނީ އެހީ ފޯރުކޮށްދިނުމަށް، މަދަނީ މީހުންނާއެކު ހެލިކޮޕްޓަރުތައް އޮޕަރޭޓް ކުރުމާއި ގުޅޭ ގޮތުން ދެ ގައުމުގެ މެދުގައި މަޝްވަރާތަކެއް ކޮށްފައިވާ ކަމަށެވެ.

ގުޅުން ބަދަހިކުރުމާ ބެހޭ ގޮތުން ފުޅާ ދާއިރާއެއްގައި އެކި ކަންތައްތަކާއި ގުޅޭ ގޮތުން އެ ބައްދަލުވުމުގައި މަޝްވަރާތަކެއް ކުރިއަށް ގެންގޮސްފައިވާ ކަމަށްވެސް އެ ބަޔާނުގައި ބުންޏެވެ.

އޭގެ ތެރޭގައި، އިންޑިއާއިން ރާއްޖޭގައި ހިންގާ މަޝްރޫއުތައް ހިންގުން އަވަސްކުރުމާއި، ދެގައުމުގެ ދެމެދުގައި ވިޔަފާރީގެ ދާއިރާ އާއި އިންވެސްޓްމަންޓްތައް އިތުރުކުރުމަށް ކުރެވޭނެ ގޮތްތަކުގެ އިތުރުން ދެ ގައުމުގެ ދެމެދުގައި ގާބިލުކަން އިތުރުކުރުމަށްވެސް މަޝްވަރާކޮށްފައިވެއެވެ.

މިކަމާ ގުޅިގެން ދިވެހިރާއްޖޭގެ ފޮރިން މިނިސްޓްރީގެ ބަހެއް ލިބޭތޯ ކުރި މަސައްކަތް ވަނީ ކާމިޔާބުވާ ގޮތް ނުވެފައެވެ.

އިންޑިއާ ސިފައިން ބޭލުމުގެ ނަމުގައި ސަރުކާރުން ގެންދަނި އޮޅުވާލުންތައް އޮޅުވާލަމުން ކަމަށް ގިނަ ބަޔަކު ގެންދަނި ބުނަމުންނެވެ. އެގޮތުން ޔުނިފޯމު އެޅި ސިފައިން ފޮނުވާލުމަށް ފަހު މަދަނީ ސިފައިން ބޭތިއްބުމުން އެ ބޭލެނީ އިންޑިއާ ސިފައިން ނޫން ކަމަށާ އެ ބޭލެނީ އިންޑިއާ ސިފައިންގެ ޔުނިފޯމު ކަމަށް ބުނެ ގިނަ ބައެއްގެ ނުރުހުން ވަނީ ސަރުކާރަށް އަމާޒުވެފައެވެ.