ރައްޔިތުންގެ މަޖިލިސް އިންތިޚާބުގެ އޮބްޒާވަރުންނާ މޮނީޓަރުން އަދި ކެންޑިޑޭޓުންގެ މަންދޫބުންނަށް ކުރިމަތިލާން ފުރުސަތު ހުޅުވާލައިފިއެވެ.

އިލެކްޝަންސް ކޮމިޝަންއިން (އީސީ) އެކްސްގައި ކޮށްފައިވާ ޕޯސްޓެއްގައި ބުނެފައި ވަނީ، ރައްޔިތުންގެ މަޖިލީހުގެ އިންތިހާބު 2024 ބާއްވާ ތާރީހު އެޕްރީލް 21 އަށް ބަދަލުވެފައިވާތީ، އިންތިހާބުގެ އޮބްޒާވަރުންނާ މޮނީޓަރުން އަދި ކެންޑިޑޭޓުންގެ މަންދޫބުން އައްޔަނުކުރުމަށް އެދި ކުރިމަތިލުމަށް އެ ކޮމިޝަނުން ވަނީ ނިންމާފައިވާކަމަށެވެ.

އެގޮތުން އެ ފުރުސަތު ހުޅުވާލާފައިވަނީ މާރިޗު 19 އިން 21 އަށެވެ.

އީސީން އާއްމުކުރި ތަފާސް ހިސާބުތައް ދައްކާ ގޮތުން އޮންލައިން ޕޯޓަލް، ''އީ ފާސް'' މެދުވެރިކޮށް 11،169 މީހަކު ވަނީ ރީ-ރަޖިސްޓްރީވާން ހުށަހަޅާފައިވެވެ. އޭގެ ތެރެއިން ސައްހަވީ 10،028 ފޯމެވެ. ރިޖެކްޓްވީ 11،141 ފޯމެވެ.

މި އިންތިހާބުގައި ރާއްޖެއިން ބޭރުގައި ވޯޓު ފޮށި ބަހައްޓާނީ ތިން ގައުމެއްގައެވެ. ބޭރު ގައުމެއްގައި ވޯޓު ފޮށި ބެހެއްޓޭނީ އީސީން ކަނޑައަޅާފައިވާ 150 އަށްވުރެ ގިނަ މީހުން ރީ-ރަޖިސްޓަރީ ކުރާ ގައުމުތަކުގައި އެކަންޏެވެ.

އެ އަދަދަށް ރީ-ރަޖިސްޓަރީ ކޮށްފައި ވަނީ މެލޭޝިޔާ، ސްރީލަންކާގެ އިތުރުން މި އިންޑިއާގައެވެ.