ރާއްޖޭގެ އެކި ކަންކޮޅުތަކުގައި ހޮސްޕިޓަލު އަޅަން ކުވެއިތު ފަންޑުން ދީފައިވާ އެހީތައް އަނބުރާ ގެންގޮސްފައިވާކަން ހާމަވެއްޖެއެވެ.

މިކަން ހާމަވެފައިވަނީ ރައްޔިތުންގެ މަޖިލީހުގައި ވަޒީރުންނާ ސުވާލުކުރުން ކުރިއަށް ގެންދާ މަރުހަލާގެ ތެރެއިން މިއަދުގެ މަޖިލީހުގެ ތަޅުމަށް ހެލްތު މިނިސްޓަރު ޑރ. އަބްދުﷲ ޚަލީލު ހާޒިރުކޮށް ސުވާލުކުރުމުގެ މަރުހަލާގެ ތެރެއިންނެވެ.

އެގޮތުން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި ކުވައިތު ފަންޑުގެ އެހީގައި ހަތް ރަށެއްގައި 30 އެނދުގެ ހޮސްޕިޓަލްތައް އިމާރާތްކުރަން ސޮއިކުރިއެވެ. ދިވެހި ކުންފުންޏެއް ކަމަށްވާ ޑެޕްލެކްސް ޕްރައިވެޓްއާ ހަވާލުކުރީ  އދ. މާމިގިލި އާއި ހދ. ހަނިމާދު، ވ. ފެލިދޫ އަދި ތ. ވިލުފުށީގައި ހޮސްޕިޓަލް ހެދުމަށެވެ. ނ. ވެލިދޫ އާއި ށ. މިލަންދު އަދި ކ. ތުލުސްދޫގައި ހޮސްޕިޓަލް އިމާރާތްކުރަން ހަވާލުކުރީ އާނަންދު ބިލްޑްޓެކް ޕްރައިވެޓް ލިމިޓެޑާއެެވެ.

އެ ހޮސްޕިޓަލްތައް ނޭޅުނީ ކުވައިތު ފަންޑުން ދިން ބައެއް ފަންޑުތައް އަނބުރާ ގެންގޮސްފައިވާތީ ކަމަށް ރައީސް ޑރ. މުހައްމަދު މުއިއްޒު ވަނީ ހދ. ހަނިމާދޫގައި ވިދާޅުވެފައެވެ. ފަންޑު އަނބުރާ ގެންދިޔަ ކަމަށް ވިދާޅުވެ ރައީސް ހެއްދެވީ އިތުރުފުޅެއް ކަމަށް ކުރީގެ ފިނޭންްސް މިނިސްޓަރު އިބްރާހިމް އަމީރު ވަނީ ވިދާޅުވެފައެވެ.

މިކަމާ ގުޅިގެން ވިލުފުށި ދާއިރާގެ މެމްބަރު ހަސަން އަފީފު ވަނީ މިހާރުގެ ސިއްހީ ވަޒީރާ ސުވާލުކުރައްވާފައެވެ.

އެގޮތުން އެ ފައިސާ އަނބުރާ ގެންދިޔަ ސަބަބާ ގުޅޭ ގޮތުން ވިލިފުށި ދާއިރާގެ މެމްބަރު ހަސަން އަފީފް ސުވާލުކުރުމުން މިނިސްޓަރު ވިދާޅުވީ ފަންޑު އަނބުރާ ގެންދިޔައީ ސަރުކާރުން ކުވެއިތު ފަންޑުގެ ޕްރޮކިއުމެންޓް އުސޫލާ ހިލާފުވެގެން ކަމަށެވެ.

މިނިސްޓަރު ޚަލީލް ވިދާޅުވީ އިންޓަނޭޝަނަލް ފަންޑިން އެޖެންސީތަކަކީ އެ އެޖެންސީތަކުން ކަނޑައަޅާ އުސޫލެއްގެ ތެރެއިން ޕްރޮކިއުމަންޓް ކަންކަން ކުރިއަށްގެންދަންޖެހޭ އެޖެންސީތަކެއްކަމަށެވެ.

މި ސަރުކާރުން އެ ފަންޑު އަނބުރާ ހޯދުމަށް މަސައްކަތް ކުރަމުންދާ ކަމަށް މިނިސްޓަރު ޚަލީލް ވިދާޅުވިއެވެ. އަދި ހޮސްޕިޓަލްތައް އެޅުމަށް ބޭނުންވާ ފަންޑު އެހެން ގޮތަކުން ހަމަޖެހޭތޯ މަސައްކަތް ކުރަމުންދާކަންވެސް ފާހަގަ ކުރެއްވިއެވެ.