އިސްލާމީ ރިވެތި އުސޫލުން ކުޅިވަރު ކުޅެން ރައީސް ޑރ.މުހައްމަދު މުއިއްޒު ނަސޭހަތްތެރިވެއްޖެއެވެ.
މުއިއްޒު މިފަދައިން ވިދާޅުވީ އެކްސްގައި ކުރި ޕޯސްޓެއްގައެވެ.
ނަމަވެސް، ރައީސް މުޢިއްޒުގެ ސަރުކާރުން މިފަދަ ދީނީ އަދި އިޖްތިމާޢީ މެސެޖުތައް ނެރުއްވަމުންދާއިރު، ސިޔާސީ މަސްރަޙުގައި ސަރުކާރަށް އަމާޒުވާ ފާޑުކިޔުންތައް ވެސް ވަނީ އިންތިހާއަށް ބޮޑުވެފައެވެ. އިދިކޮޅު ފަރާތްތަކުންނާއި ސިޔާސީ ބައެއް މުޙައްލިލުން ތުހުމަތުކުރާ ގޮތުގައި، މި ސަރުކާރުން ދަނީ ސިޔާސީ މަންފާ ހޯދުމަށްޓަކައި ވަކި ޚާއްޞަ ދަނޑިވަޅުތަކެއްގައި "ދީނީ ކާޑު" ބޭނުންކުރަމުންނެވެ. ދައުލަތުގެ ބޮޑެތި މައްސަލަތަކާއި، އިޤްތިޞާދީ ގޮންޖެހުންތަކުން ރައްޔިތުންގެ ސަމާލުކަން އަނބުރާލުމަށްޓަކައި، ކޮންމެ ފަހަރަކު ވެސް ދީނީ ޝިއާރުތަކާއި ޖަޒުބާތުތައް ކުރިއަށް ނެރެނީ ސިޔާސީ އައްޑަނައެއްގެ ގޮތުގައި ކަމަށް ފާޑުކިޔާ ފަރާތްތަކުން ބުނެއެވެ.
މީގެ އިތުރުން، ސަރުކާރުގެ ޢަމަލުތައް ހުރި ގޮތުން، ދީނުގެ ނަމުގައި ރައްޔިތުން "މޮޔަހައްދަމުން" ދާކަމުގެ ތުހުމަތު ވެސް ވަނީ ފެންމަތިވެފައެވެ. ކެމްޕޭން ދުވަސްވަރާއި ސިޔާސީ ބޮޑެތި ނިންމުންތައް ނިންމާއިރު ދީނީ ކަންކަމަށް ދޭ ސަމާލުކަމާއި، ޢަމަލީ މައިދާނުގައި ކަންކަން ހިނގަމުންދާ ގޮތާ ދިމާނުވާކަން ގިނަ ބަޔަކު ފާހަގަކުރެއެވެ. ރައްޔިތުންގެ ހިތްތަކުގައި ދީނަށް އޮންނަ ލޯތްބާއި އިޙްތިރާމްގެ ނާޖާއިޒު ފައިދާ ނަގައި، ސިޔާސީ މަޤްޞަދުތައް ޙާޞިލްކުރުމަށް ދީން ހަތިޔާރަކަށް ހެދުމަކީ ޤަބޫލުކުރެވޭނެ ކަމެއް ނޫން ކަމަށް ބުނެ، ސަރުކާރުގެ އިޚްލާޞްތެރިކަމާމެދު މިހާރު ދަނީ ބޮޑެތި ސުވާލުތަކެއް އުފައްދަމުންނެވެ.
