ރާއްޖޭގައި އަރިދަފުސް ރޯގާ ޖެހޭ މިންވަރު އިތުރުވެފައިވާ ކަމަށް މިދިޔަ އަހަރުގެ ޑިސެމްބަރު މަހުގެ ތަފާސްހިސާބުތަކުން ދައްކައިފިއެވެ.

އެގޮތުން މިދިޔަ އަހަރުގެ ނޮވެމްބަރު މަހު އަރިދަފުސް ރޯގާ ޖެހިގެން 30،410 ވޭދަނަ ރިޕޯޓްކޮށްފައިވާއިރު، ޑިސެންބަރު މަހު 31،225 ވޭދަނަ ރިޕޯޓްކޮށްފައިވާކަމަށް ތަފާސްހިސާބުތަކުން ހާމަވެއެވެ.

ސިއްހަތާއި ބެހޭ ވުޒާރާއިން ބުނީ މިދިޔަ އަހަރުގެ ނޮވެމްބަރު މަހާ އަޅާބަލާއިރު ޑިސެމްބަރު މަހު އަރިދަފުސް ރޯގާ ޖެހިގެން ރިޕޯޓް ކުރެވުނު އަދަދު މައްޗަށް ގޮސްފައިވާ ކަމަށެވެ. އެހެންކަމުން ކޮވިޑް އަދި އިންފްލުއެންޒާ ފަދަ ރޯގާ ތަކުން ރައްކާތެރިވުމަށް ފިޔަވަޅު އެޅުމަކީ މުހިންމު ކަމެއް ކަަމަށްވެސް އެ ވުޒާރާއިން ވަނީ ބުނެފައެވެ.

އިންފްލުއެންޒާއަށް ބަލާއިރު، ޑިސެމްބަރު މަހު އެ ބައްޔަށް 24 މީހަކު ވަނީ ފައްސިވެފައެވެ. އަދި މި އަހަރުގެ މިހާތަނަށް 2،380 މީހަކު ޓެސްޓު ކުރިއިރު، 413 މީހަކު ވަނީ ފައްސިވެފައެވެ.

ޑިސެމްބަރު މަހު ބޭރަށް ހިންގުން ދަށްވެފައިވާއިރު ޑެންގީ ހުންވެސް ވަނީ އޭގެ ކުރީ މަހާ އަޅާކިޔާއިރު ދަށްވެފައިކަން ފާހަގަކޮށްލެވެއެވެ.