ރައީސް އަބްދުﷲ ޔާމީން އަބްދުލްގައްޔޫމް އިސްވެ ހުންނަވާ ރާއްޖޭގައި ހިންގި އިންޑިޔާ އައުޓް ކެމްޕެއިންގެ ސަބަބުން އިންޑިޔާގެ ޓީޗަރުންތަކެއް ރާއްޖެ ދޫކޮށްފައި ދިޔަ ވާހަކައަކީ ދޮގެއްކަން ހާމަވެއްޖެއެވެ.

ރައްޔިތުންގެ މަޖިލީހުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި މެމްބަރަކު ކުރެއްވި ސުވާލަކަށް ޖަވާބުދެއްވަމުން އެޑިއުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވީ ސްކޫލްތަކުގައި ޓީޗަރުން މަދުވުމުގެ "ކްރައިސިސްއެއް" ނެތް ކަމަށެވެ.

އޭނާ ވިދާޅުވީ ޓީޗަރަކު ހިނގައްޖެ ނަމަ މަދު ހަފުތާތަކަށް ދަތިކަން އައިސްދާނެ ކަމަށާއި ރާއްޖެއަށް އަންނަ ބޭރު ޓީޗަރުން ބައެއް ފަހަރު ވަަރަށް އަވަހަށް ވެސް ވަކިވާ ކަމަށެވެ.

މިނިސްޓަރު މިފަދައިން ވާހަކަ ދެއްކެވީ އިންޑިއާ އައުޓް ސިޔާސަތުގެ ތެރެއިން ވަރަށް ގިނަ ޓީޗަރުން ރާއްޖެެއިން ފުރައިގެން ހިނގައްޖެ ކަމަށް ވިދާޅުވެ، ފުނަދޫ ދާއިރާގެ އެމްޑީޕީ މެމްބަރު މުހައްމަދު ޝާހިދު ސުވާލު ކުރެއްވުމުންނެވެ.

އިންޑިޔާގެ ސިފައިން ރާއްޖޭގެ އެކި ކަންކޮޅުތަކުގައި ގާއިމްވެފައި ތިބުމުން ރައީސް ޔާމީން އިސްވެ ހުންނަވާ ހިންގެވި ކެމްޕެއިންގެ ސަބަބުން އެމްޑީޕީމން ވަނީ މިފަދަ ދޮގު ޚަބަރުތަކެއް ފަތުރާފައެވެ.