އަނެއްކާވެސް މަސްވެރިންނަށް ދޭން ޖެހޭ ފައިސާގެ 10 ވަރަކަށް ދުވަހުގެ ބެކްލޮގެއް އުފެދިއްޖެ އެވެ.
މި މަހުގެ ހަތްވަނަ ދުވަހާ ހަމައަށް މަސްވެރިންނަށް ނުދެވި ހުރި ފައިސާ މި މަހު 10 ގައި ވަނީ ދީފައެވެ. ނަމަވެސް އޭގެފަހުން މަސްވެރިން ބޭނި މަސްތަކަށް ފައިސާ ދީފައިނުވެއެވެ.
މިކަމާ ބެހޭ އިތުރު އެއްވެސް މައުލޫމާތެއް މަސްވެރިކަމާ ބެހޭ ވުޒާރާގެ ފަރާތުން އަދި ލިބިފައިނުވެއެވެ.
މި ސަރުކާރު އުފެދުނު ފަހުން މަސްވެރިން ކިރުވި މަހަށް ފައިސާ ނުދޭތާ ދެމަސް ވުމުން މިދިޔަ މަހު ގދ. ކޫއްޑޫގައި ހުންނަ މަސް ފެކްޓަރީ ބަންދުކޮށް އެތައް ދުވަހެއް ވަންދެން މަސްވެރިން ވަނީ އިހްތިޖާޖްވެސްކޮށްފައެވެ.
މަސްވެރިންނަށް ފައިސާ ދޫކުރަން ފެށީ އެ އިހްތިޖާޖްގެ ތެރެއިން ކަންވެސް ފާހަގަކޮށްލެވެއެވެ.
މަސްވެރިންނަށް ފައިސާ ދޫކުރަން ފެށުމުގެ ކުރިން މިދިޔަ ޑިސެމްބަރު މަހުން ފެށިގެން އެއްވެސް ފައިސާއެއް މަސްވެެރިންނަށް ނުލިބޭ ކަމަށް މަސްވެރިން ވަނީ މައުލޫމާތުދީފައެވެ.
ސަރުކާރުން ބުނާ ގޮތުގައި، ސަރުކާރާ ހަވާލުވި އިރު ވެސް 250 މިލިއަން ރުފިޔާ ބެކްލޮގުގައި ހުއްޓެވެ.
އަދުގެ ރައީސް މުއިއްޒުގެ ވައުދަކީ މަސްވެރިންނަށް ކިރާ މަހަށް 48 ގަޑިއިރުގެ ތެރޭގައި ފައިސާ ދޫކުރުމެވެ. ނަމަވެސް ފެނިގެންދަނީ މަސްވެރިން ކިރާފައި ހުރި މަސްކޮޅަށް ފައިސާ ނުދީ ހިފަހައްޓައިގެން އުޅޭ މަންޒަރެވެ.
