ރައްޔިތުންގެ މަޖިލީހުގެ ކެލާ ދާއިރާގެ އެމްޑީޕީ މެމްބަރު އިބްރާހީމް ޝަރީފު އަމިއްލަ ކަމެއްގައި ރައްޔިތުންގެ މަޖިލީހުގެ ޖަލްސާގައި މައްސަލަ ބޮޑުކޮށްފިއެވެ.

ރައްޔިތުންގެ މަޖިިލީހުގެ ޖަލްސާއަށް ހޯމް މިނިސްޓަރު އަލީ އިހުސާން ވަޑައިގެންނެވީ ވަޒީރުންނާ ސުވާލުކުރުމުގެ ވަގުތުގައި އިހަވަންދޫ ދާއިރާގެ އެމްޑީޕީ މެމްބަރު މުހައްމަދު ޝިފާއު ކުރެއްވި ސުވާލަކާއި އެ ސުވާލާ ގުޅިގެން މެމްބަރުން ކުރައްވާ ސުވާލުތަކަށް ޖަވާބުދެއްވުމަށެވެ.

ޝިފާއު ކުރެއްވި އެއް ސުވާލަކީ، "ޑިސެމްބަރު 17، 2023 ، ގެ ނިޔަލަށް ރާއްޖޭގައި ވަޒީފާ އަދާކުރުމަށް ޓަކައި ބަންގްލަދޭޝްގެ ރައްޔިތުން ތިބި އަދަދަކީ ކޮބައިތޯ؟" އެވެ.

ދެވަނަ ސުވާލަކީ ނޮވެމްބަރު 12، އިން ފެށިގެން ޑިސެމްބަރު 17، އާ ހަމައަށް ރާއްޖޭން ފުރި ބަންގްލަދޭޝް މީހުންގެ އަދަދަކީ ކޮބައިތޯ؟" އެވެ.

އެ ސުވާލަށް މިނިސްޓަރު ޖަވާބު ދެއްވުމާ އެކު ގުޅުން ހުރި ބައެއް ސުވާލުތައް އެހެން ބައެއް މެންބަރުން ކުރެއްވި ފަހުން ކެލާ ދާއިރާގެ މެންބަރު ޝަރީފު ސުވާލުކުރެއްވީ އޭނާ ކުއްޔަށް ދޫކުރައްވައިގެން އުޅުއްވާ ތަނެއްގައި ތިބި ބަޔަކު ކުލި ނުދައްކާތީ ފުލުހުންނަށް ހުށަހަޅައިގެން ކުރިއަށް ނުގޮސްގެން، ދެން އަމަލުކުރައްވަންވީ ގޮތަކާ ބެހޭ ގޮތުންނެވެ.

އެ އީ މަދަނީ މައްސަލައެއް ކަމަށާއި ވަޑައިގަންނަވަން ޖެހޭނީ ސިވިލް ކޯޓަށް ކަމަށް ހެންވޭރު ޕޮލިސް ސްޓޭޝަނުން ޝަރީފަށް ޖަވާބު ދެމުން ބުނިކަން އޭނާ ވަނީ ފާހަގަކުރައްވާފައެވެ.

މަޖިލީހުގެ ރައީސް މުހައްމަދު އަސްލަމް ވިދާޅުވީ ޝަރީފުގެ ވާހަކައިން ސުވާލެއް ފާހަގަ ނުވާ ކަމަށެވެ.

އޭފެ ފަހުން ނިޒާމާ ބެހޭ މައްސަލައެއް ކަމަށް ވިދާޅުވެ ޝަރީފް ވަނީ ފުރުސަތެއް ހޯދައްވާފައެވެ.