ދިވެހި ޒުވާނުންނަކީ ހަރުދަނާ ބައެއްގެ ގޮތުގައި އޭނާގެ މަޖިލސިް މެމްބަރުކަމުގައި ދައްކާ ދެއްވާނެ ކަމަށް، ޕީޕަލްސް ނެޝަނަލް ފްރޮންޓް (ޕީއެންއެފް) އިން 20 ވަނަ ރައްޔިތުންގެ މަޖިލީހުގެ ތުލުސްދޫ ދާއިރާއަށް ކުރިމަތިލައްވާ އަހުމަދު ޝާމިލު އަބްދުﷲ ވިދާޅުވެއްޖެއެވެ.

ޝާމިލު މިފަދައިން ވިދާޅުވެފައިވަނީ މަޖިލީހަށް ޕީއެންއެފްގެ ފަރާތުން ކުރިމަތިލާ ކެންޑިޑޭޓުންގެ ސިޔާސަތުތައް ޙާމަކުރުމަށް ބާއްވަމުންދާ ސިލްސިލާ ޖަލްސާތަކުގެ ތެރެއިން އަންގާރަ ދުވަހުގެ ރޭ ދަ ފްރޮންޓު އޮފީހުގައި ބޭއްވި ޖަލްސާގައި ވާހަކަ ދައްކަވަމުންނެވެ.

ޝާމިލު ވިދާޅުވީ، އޭނާގެ ވިސްނުމުގައި ގައުމުގެ ކަންކަން ނިންމުމުގައި ޒުވާނުންނަކީ ވަރަށް މުހިއްމު ދައުރެއް އަދާކުރާ ބައެކެވެ. އެހެންކަމުން އެ ޒުވާނުންނަކީ މުޖުތަމައަށް ބޭނުންވާ ވަރުގެ ހަރުދަނާ ބަޔަކަށް ހެދޭނީ އެ ޒުވާނުންނަކީ ވެސް ފުދުންތެރި ދިރިއުޅުމެއް އުޅެވޭ ވަރުގެ ބަޔަކަށް ހެދިގެން ކަމަށް ވުމުން މަގުމަތީ ގިނަވެފައި ތިބި ޒުވާނުންނަށް ވަޒީފާގެ ފުރުސަތަކީ ވަރަށް މުހިއްމު އެއްޗެއް ކަމަށެވެ.

މީގެއިތުރުން، ޝާމިލް ފާހަގަކުރި ގޮތުގައި ނިމިދިޔަ ސަރުކާރުގައި ވެސް މި ސަރުކާރުގައިވެސް ވަޒީފާތައް ދިފައިވަނި ހައްގުވެރިންނަށް ނޫން ކަމަށެވެ. އެގޮތުން މި ދެ ސަރުކާރުގައިވެސް ވަޒީފާތައް ބަހަމުން ގެންދަނީ ވެރިންގެ ގާތް މިހުންނަށްކަމެވެ. އަދި ވަޒީފާގެ އިތުރުވުން ނެތް އިރު އެކަން އެގޮތަށް ކުރުމުން ނިކަމެތިން ހަމަ ނިކަމެތި ގޮތުގައި ތިބެން ޖެހިފައިވާކަން ވެސް ޝާމިލު ފާހަގަކުރިއެވެ.

ޝާމިލު މިފަދައިން ވިދާޅުވެފައިވާއިރު، އޭނާ ތަމްސިލު ކުރާ ޕީއެންއެފްގެ ބާނީ، ރައީސް އަބްދުﷲ ޔާމީންގެ ވެރިކަމަށް ބަލާލާއިރު 1,04,000 ވަޒީފާ އުފައްދާފައިވެއެވެ. އަދި އެމަނިކުފާނަކީ ދިވެހިން ޒުވާނުންނަށް ފަހި ފުރުސަތުތަކެއް ހޯދާ ދެއްވުމުގެ ގޮތުން ފުރަތަމަ ފަހަރަށް ޒުވާނުންނަށް ޚާއްސަކޮށް މެނިފެސްޓޯއެއްވެސް އެކުލަވާލެއްވި ރައީސެވެ.