ދިމާވި ސިއްހީ ކުއްލި މައްސަލައަކާ ގުޅިގެން އިމާމްވެ ތަރާވީޙު ނަމާދުކުރުން އިސްލާމިކު މިނިސްޓަރު، ޑރ. މުހައްމަދު ޝަހީމު އަލީ ސައީދު ހުއްޓާލައްވައިފިއެވެ.
އަމިއްލަ ފޭސްބުކު ޕޭޖުގައި ހިއްސާ ކުރެއްވި މައުލޫމާތުގައި ޑރ. ޝަހީމު ވިދާޅުވެފައިވަނީ، ދިމާވި ސިއްހީ ސަބަބަކާ ގުޅިގެން ގިނައިރު ކޮޅަށް ހުންނަން ދަތިވުމާ ގުޅިގެން ތަރާވީހު ނަމާދުކުރުން މެދުކަނޑާލަން ޑޮކްޓަރު ލަފާ ދެއްވާފައިވާ ކަމަށެވެ.
ޝަހީމް ވަނީ މިކަމާ ގުޅިގެން ވަރަށް އަވަހަށް ސާޖަރީއަކަށް ވަޑައިގަންނަވަން ޖެހިފައިވާކަން ވެސް ހާމަކުރައްވައިފައެވެ. އަދި ފަރުވާގެ ކަންކަން ފުރިހަމަވުމުން އަލުން އިމާމުކަމަށް އައުމަށް ނުހަނު އުންމީދުކުރައްވާކަމަށްވެސް ވިދާޅުވެފައިވެއެވެ. ހުރިހާ ފަރާތްތަކުގެ ހެޔޮ ދުއާއަށްވެސް ޑރ. ޝަހީމުވަނީ އެދިވަޑައިގެންފައެވެ ނަމަވެސް މެދުވެރިވީ ކޮން ސިއްހީ ސަބަބެއް ކަމަށް ވިދާޅުވެއްނުވެއެވެ.
