2018 ވަނަ އަހަރު ގައުމުގައި ހަލަބޮލިކަމަކާ އެކު ބަދަލުވެގެން ދިޔަ ސަރުކާރާ އެކު އިވިގެން ދިޔައީ ކަންކަން ކޮށް ނުދޭ ވާހަކައެވެ. ރައްޔިތުންނަށް ބޭނުންވާ އަސާސި ހައްގުތަކުން ރައްޔިތުން މަހްރޫމުކޮށް ވެރިންގެ ޖީބު ބަރާކުރަމުންދިޔަ ވާހަކައެވެ.

އެގޮތުން ވެރިކަމަށް އައިސް ފުރަތމަ އަހަރު އެކަނި ވެސް 32 ބިލިއަންގެ ބަޖެޓެއް ފެންފޮދަކާ ނުލާ ދިރުވާލި ވާހަކައަކީ ނިކަން ހަރު އަޑުން އޭރު އިދިކޮޅުގައި ތިބެ އަދުގެ ވެރިން ދެއްކެވި ވާހަކައެކެވެ.

މީގެ އިތުރުން ތަރައްގީގެ މަޝްރޫއުތައް ކުރިއަށް ނުގެންދިއުމާ ގައުމު ހިންގުމުގެ ސްޕީޑު ލަސް ވާހަކވެސް އޭރު އެންމެ ގިނައިން ދެއްެވި ބޭފުޅުން މިހާރު ތިއްބެވީ ސަރުކާރުގެ ިއސް ފަޑީގައެވެ.

މިހާ ހިސާބުން ދެން ހިތަށް އެރި ކަމަކީ މިއަދު ކަންކަން އެބަ ވޭ ބާއެވެ. މިހެން މި ސުވާލު ހިތަށް އަރަން ޖެހުނު ސަބަބކީ މިހާރު ހަމަ ވަރަށް ގިނައިން "ކުރީ ސަރުކާރު" މިހެން، ކުރީ ސަރުކާރު" އެހެން ކިޔާ އަޑު ވެރިންގެ މެދުގައި ހަރުވެގެން ދާތީއެވެ.

ކޮންމެ ކަމެއް ނުވެ ލަސްވެއްޖެ "ކުރީ ސަރުކާރު"އެވެ. ކަމެއް ގޯސްކޮށް ހިނގައިފި ނަމަވެސް "ކުރި ސަރުކާރު"އެވެ.

ގައުމުގައި ތަރައްގީގެ މަޝްރޫއުތައް ހުއްޓާލީ ފައިސާ ނެތިގެން ކަމަށް މާލީ ވަޒީރު ވިދާޅުވިއިރު އެކަންވެސް ޖާމިނުކުރަނީ ކުރީ ސަރުކާރާއެވެ. އާދޭހެވެ. ރަގަޅު ވާހަކައެކެވެ. ކުރި ސަރުކާރުން ވަނީ ގައުމު ހަފުސްކޮށް ކަފުންވެސް ކޮށްފައެވެ. އިގްތިސޯދު ނޭވާ ހޮޅިއަށް އެޅި ވެންޓިލޭޓަރަށް ލާފައެވެ.

ނަމަވެސް ސުވާލަކީ މިހާރު މިއޮތީ އެކަންކަން ރަގަޅު ކުރަން ރައްޔިތުން "ބޮޑު" އަޣްލަބިއްޔަތެއް ދިގެން ގެނައި ސަރުކާރަށްވީިއިރު ކަމާ ގުޅުން ފަންނީ މާހިރުންގެ ލަފަޔާ އިރުޝާދު ހޯދައިގެން ކަންކަން ހަމަމަގަށް އަޅުވަން މަސައްކަތް އެބަ ކުރޭ ބާއެވެ؟

ސަރުކާރުގެ ކޮންމެ ވުޒާރާއަކުން ނޫސްވެރިންގެ ބައްދަލުވުމެއްވެސް ބޭއްވި ނަމަވެސް "ކުރީ ސަރުކާރު" ވާހަކަ އެއް ދައްކާނުލާ ނިންމާ ނުލައްވައެވެ. ކަންކަން މިހެން ވާން ފެށުމުން މި ސަރުކާރު ރައްޔިތުން ގެނައި ސަބަބާ މެދުވެސް ސުވާލު އުފެދޭ ނޫންތޯއެވެ؟

އުއްމީދާ އެކު ގެނައި ދިވެހީންގެ ރާއްޖޭގައި "ކުރީ ސަރުކާރުގެ ޓެގު އަޅުވައިގެން ހިދުމަތްތައް ހުއްޓިފައި އޮތުމަކީ އެއީ ބަލައިގަނެވޭނެކަމެއް ނޫންކަން ޔަގީނެވެ.

ބޯހިޔާ ވަހިކަމާ ގުޅޭ ގޮތުންވެސް "ކުރީ ސަރުކާރު"ގެ ޓެގެވެ. ސިއްހީ ނިޒާމު ފެއިލްވެ އެތައް ބަޔަކަށް އޭގެ ގެއްލުންވަމުންދާއިރު ވެސް "ކުރި ސަރުކާރެވެ". ރިކަރަންޓު ޚަރަދަށްވުރެ ޕީއެސްއައިޕީ މަދުވުމުންވެސް ކުރީ ސަރުކާރެވެ.

ތަރައްގީއަށް ކުރާ ހޭދަ ކުޑަކުރުމަށް ފަހުވެސް ކުރި ސަރުކާރުންނެވެ. ގައުމުގެ އިގްތިސޯދު ހަމަމަގަށް އަޅުވަން ނޭގުމުންވެސް ކުރީ ސަރުކާރެވެ. މަތިބަރު ސަރުޚަރަކާ އެކު ފިޔަން ހިއްލާ ނުލެވުނީމަވެސް ކުރި ސަރުކާރެވެ.

މި ސަރުކާރު ވެރިކަމަށް އައިސް މުޅިންވެސް ބުނަމުން ދަނީ ކުރީ ސަރުކާރުން ކަންކަން ކޮށްފައި ހުރި ގޮތުން މި ސަރުކާރު ހިންގުމަށް ބުރޫ ތަކެއް އަރާ ވާހަކައެވެ. މަސް ނުބޭނުނީމާ ކަނޑު ގޯސް ވާހެން މި ސަރުކާރަށް ކަމެއް ނުކުރެވުނީމާ ގޯސްވަނީ ނިމި ދިޔަ ސަރުކާރެވެ.

ދެން އެހެން ކަމަށް ވަނީ ނަމަ މި ސަރުކާރު ވެރިކަމަށް އައީ ކީއްކުރަން ބާއެވެ؟ ރައްޔިތުންނަށް ވައުދުތަކެއް ވީ ކީއް ކުރަންބާއެވެ. ނު ފޯރާ ފޮތިން ފޫ ގަޅަން ތިޔަ އުޅުއްވަނީ ކީއްކުރަން ތޯއެވެ؟ މުސް ކުޅިން ބުނެ އުޅޭތި އަޑު އަހަމުއެވެ. ކިތަންމެ ވަރަކަށް ފެލިޔަސް އެ އެއްޗެއްގައި ނެތް ދިޔައެއް ނުނިކުންނާނެއޭއެވެ. އެހެންކަމުން ވެރިކަން ކުރަން ނޭނގޭ ބަޔަކާ ޤައުމު ހިންގުން ހަވާލުކުރީމާ ވާނީ މިހެންނެވެ.

ސަރުކާރު ގެންނަން މަސައްކަތް ކުރި މީހުންވެސް މިހާރު ތިބީ ސަހަރޯ ހީވެފައެވެ. ވާނީވެސް އެހެންތާ ވެރިކަމަށް ގެނެވުނީ އެގަހު ކޭލެއް މިގަހު ކޭލެއް ވަކި ކުރަން ނޭނގޭ ބައެކެވެ.

މިހާ ހިސާބުން ހަނދާނަށް އަންނަނީ ހަރުބަހެކެވެ. މެކުނު ފުމުނަކަސް ގާހަކައަކަށް ނުފުމެވޭނެއެވެ. އެހެންކަމުން އިކޮނޮމިސްޓަކު ޤައުމު ހިންގިޔަސް އަދި ކުރެހުމުގެ ޕީއެޗްޑީ އޮތް ބޭފުޅަކަށް ގައުމު ނުހިންގެނެކަން މިދަނީ ހާމަވަމުންނެވެ.

މިއަދުގެ މި ސަރުކާރުހައި ޗަސްބެއް ނެތް ސަރުކާރެއް ނެތެވެ. ހަގީގަތުގައިވެސް މިއަދުގެ ސަރުކާރަކީ ވަރަށް ވަކަ ސަރުކާރެކެވެ. . މިކަން ހަމަ މަގަށް އަޅުވަން މަޖިލީސް އިންތިހާބުގައި ޖެހޭނެއެވެ.

"ކުރީ ސަރުކަރުގެ" ޓެގު އަޅުވައިގެން ކަންކަމުން ބޯ ދަމައިގަނެވުނަ ދީގެން ހިލާ ނުވާނެއެވެ.