ކޮލަމާފުށީ ދާއިރާގެ ޕީޕީއެމް/ޕީއެންސީ ކެންޑިޑޭޓްގެ ކެމްޕެއިނަށް ގއ.މާމެންދޫއަށް ވަޑައިގަތުމުން މާލޭ ސިޓީ ކައުންސިލްގެ ޑެޕިޔުޓީ މޭޔާރ އަހްމަދު ނަރީޝް އަށް ހަމަލާދިން ގޮތް ހާމަކޮށްފިއެވެ.
ޗެނަލް 13 އަށް މައުލޫމާތުދެމުން ނަރީޝް ވިދާޅުވީ އޭނާއަށް ހަމަލާދިނީ އޭނާއާ ނުވެސް ބެހޭކަމެއްގައިކަމަށެވެ. ހަމަލާ ދިނީ އެމްޑީޕީގެ އެކްޓިވިސްޓުންކަމަށްވެސް ނަރީޝް ވިދާޅުވިއެވެ.
ވީގޮތް ތަފްސީލްކޮށް ކިޔައިދެމުން ނަރީޝް ވިދާޅުވީ އެމްޑީޕީ އެކްޓިވިސްޓުން އޭނާ އަށް ހަމަލާދޭން އައި އިރު ހުރީ މަސްތުގެ ހާލަތުގައިކަމަށެވެ.
ކުރިޔަށް އޮތް މަޖިލިސް އިންތިޚާބްގެ ކެމްޕެއިނަށް ކޮލަމާފުށީ ދާއިރާ އަށް ވާދަކުރައްވާ ޕީޕީއެމް ޕީއެންސީ ގެ ކެންޑިޑޭޓްގެ ކެމްޕެއިން ޓީމެއް އެ ރަށުން މާމެންދޫ އަށް ދިޔުމަށް ހަމަޖެހިފައިވުމުން މާމެންދޫގައި ދިޔައީ އެ ކޯލިޝަންގެ މެމްބަރުން އިވެންޓް އޮތް ސަރަހައްދު ތައްޔާރުކުރަމުންނެވެ.
ހަމަ އެކަން ސާފުކޮށް އެމްޑީޕީގެ ސަޕޯޓަރުންނަށް އެނގިހުރެ ގަސްތުގައި އެ ސަރަހައްދުގައި އެ ދާއިރާއަށް ވާދަކުރައްވާ އެމްޑީޕީގެ ކެންޑިޑޭޓްގެ ބިލްބޯޑް ބެހެއްޓުމުން މާމެންދޫގެ ޕީއެންސީ ސަޕޯޓަރުން ހިތްހަމަނުޖެހިގެން އެ ބިލްބޯޑް ކުރިމަތީ ފިޔާތޮށި ކުލައިގެ ފޮތިގަނޑެއް ވަނީ ދަމާފައެވެ.
އެހެންކަމުން އެކަމާ އެމްޑީޕީން ރުޅި އައިސްގެން ކޮލަމާފުށިން، މާމެންދޫއަށް ކެމްޕެއިނަށް ދިޔަ ޓީމަށް ވަނީ ހަމަލާދީފައެވެ.
ހަމަލާދިނުމުން އެއްވެސް އަނިޔާއެއް ލިބިފައިނުވާކަމަށް ނަރީޝް ވަނީ ޗެނަލް 13 އަށް ކަށަަވަރުކޮށްދީފައެވެ. ނަމަވެސް ކެމްޕެއިން ކުރަން ދިޔަ ޓީމަކަށް އެގޮތައް އެހެން ޕާޓީއެއްގެ އެކްޓިވިސްޓުން ހަމަލާދިނުން އެއީ ބަލައިގަނެވޭނެ ކަމެއް ނޫންކަމަށްވެސް ނަރީޝް ވަނީ ވިދާޅުވެފައެވެ.
ހުރިހާ ޕާޓީއަަކަށް ވެސް ހަމަ ހަމަ ކަމާއި އެކީ ސިޔާސީ ހަރަކާތް ހިންގަން ފުރުސަތު އޮންނަންވާނެ
ޑެޕިޔުޓީ މޭޔާރ އަހްމަދު ނަރީޝް
ފާހަގަކޮށްލެވޭ ގޮތުގައި އެމްޑީޕީ އަކީ އަބަދުވެސް ކެމްޕެއިން ކުރުމުގައި އަމަލުތައް މިފަދައިން ގެންގުޅޭ ބަޔެކެވެ.
އަނިޔާކުރުމާއި އެހެންމީހުންނަށް ޖެއްސުމަށް ކަންކަން ކުރުމަކީ ހުއްޓުމެއްނެތި އެމްޑީޕީގައި ހިނގަމުން އަންނަ ސިޔާސަތެއް ކަން ފާހަގަކޮށްލެވެއެވެ.
