މާލެ ސިޓީގެ ޑެޕިއުޓީ މޭޔަރު، މާފަންނު މެދު ދާއިރާގެ ކައުންސިލަރ އަހުމަދު ނަރީޝް މަގާމުން އިސްތިއުފާ ދެއްވައިފި އެވެ.

ނަރީޝް ހުށަހެޅުއްވި އިސްތިއުފާގެ ސިޓީގައި ވަނީ އޭނާއަށް ވޯޓު ދެއްވި ރައްޔިތުންނަށާއި އެ މަގާމަށް އޭނާ ހޮވައިދިނުމަށް މަސައްކަތް ކުރި ޕީޕީއެމް، ޕީއެންސީގެ ލީޑަޝިޕަށް ޝުކުރު އަދާ ކުރައްވައިފައެވެ. ނަމަވެސް ނަރީޝްގެ ސިޓީގައި އިސްތިއުފާ ދެއްވާ ސަބަބު ބަޔާންކުރައްވާފައިނުވެއެވެ.

ނަރީޝް އެ މަގާމުން އިސްތިއުފާ ދެއްވަން އުޅުއްވާ ކަމުގެ އަޑުތައް މީގެ ދެތިން ދުވަހެއް ކުރިން ފެށިގެން އާންމުންގެ ތެރޭގައި ދިޔައީ ފެތުރެމުންނެވެ. އަޑުތައް ފެތުރިފައި ވަނީ ސަރުކާރުގެ މަގާމަކާ ހަވާލުވުމަށް ނަރީޝް އިސްތިއުފާ ދެއްވަނީ ކަމަށެވެ. ނަމަވެސް ރަސްމީކޮށް މިކަން އަދި ކަށަވަރެއް ނުވެއެވެ.

ނަރީޝްގެ އިސްތިއުފާގެ ސިޓީގައި އޭނާ ވަނީ ކުރީގެ މޭޔަރު، އަދި މިހާރުގެ ރައީސުލްޖުމްހޫރިއްޔާ އަށާއި މިހާރުގެ މޭޔަރު އާދަމް އާޒިމްގެ ފަރާތުން ދަސްވި ކަންކަމަށްޓަކައި އެ ދެ ބޭފުޅުންނަށް ޝުކުރު އަދާ ކުރައްވައިފަ އެވެ. އަދި ވިދާޅުވެފައި ވަނީ ސިޓީ ކައުންސިލުގެ މެންބަރެއްގެ ގޮތުގައި ހޭދަ ކުރެވުނު ދުވަސްތަކަކީ އޭނާގެ ހަޔާތުގައި ފާއިތުވި އެންމެ އުފާވެރި ދުވަސްތައް ކަމަށާއި އެ ތަނުގައި ހޭދަ ކުރި މުއްދަތުގެ ތެރޭގައި އަމިއްލަ ޝަހުސިއްޔަތު ބިނާ ކުރުމަށް ބާރު ލިބިގެން ދިޔަ ކަމަށެވެ.