ޓްރާންސްފޯމަރަކުން ވައްކަން ކުރަން އުޅެނިކޮށް ކަރަންޓުގައި ޖެހި ޒުވާނަކު މަރުވެއްޖެއެވެ.
ފުލުހުން ހާމަކޮށްފައިވާ ގޮތުގައި އެ ޒުވާނާ ކަރަންޓުގައި ޖެހިފައި އޮއްވައި ފެނުނީ ހުޅުމާލެ 2ގެ ހިޔާ ސަރަހައްދު ޕެޓްރޯލް ކުރަމުން ދިޔަ ފުލުހުންނަށް ރޭގެ ފަތިހު 4:07 ހާއިރު ކަމަށެވެ.
އެގޮތުން އެޗް 3 ޓަވަރުގެ ކައިރީގައި ހުންނަ ޓްރާންސްފޯމަރު ތެރެއަށް ވެއްޓިފައި އޮތް 27 އަހަރުގެ ޒުވާން ފިރިހެނަކު ހޮސްޕިޓަލަށް ގެންދިޔައިރު ވެސް މަރުވެފައިވާ ކަމަށް ފުލުހުން ހާމަކޮށްފައިވެއެވެ. ޓްރާންސްފޯމަރު ތެރެއަށް އޭނާ ވެއްޓިފައި އޮތީ އަނިޔާތަކަކާ އެކު ކަމަށް ވެސް ފުލުހުން ވަނީ ބުނެފައެވެ.
ޓްރާންސްފޯމަރަކުން ވައްކަން ކުރަން އުޅެނިކޮށް ކަރަންޓުގައި ޖެހުނީ ހއ. ހޯރަފުށީގެ ޒުވާނެއް ކަމަށްވާ ހުސައިން ޝިފާއުއެވެ.
މިކަން ސްޓެލްކޯގެ ފަރާތުންވެސް ވަނީ ޔަގީން ކޮށްދީފައެވެ.
އެގޮތުން އެކުންފުނީގެ މެނޭޖިން ޑިރެކްޓަރ ހުސެއިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ހުޅުމާލޭ ދެވަނަ ފިޔަވަހީގައި ހުރި ޓްރާންފޯމަރަކުން ވައްކަން ކުރަން އުޅެނިކޮށް ކަރަންޓުގައި މީހަކު ޖެހި ހިތާމެރި ހާދިސާއެއް ވަނީ ހިނގާފައި ކަމަށެވެ.
މި ހާދިސާ ހިނގާފައިވާއިރު، ސްޓެލްކޯގެ ޓްރާންސްފޯމަރުތަކުން ވައްކަން ކުރުން މި ރޯދަމަހު އިތުރުވެ ބައެއް މިސްކިތްތަކުގައި ނަމާދުގަޑީގައި ނަމާދު މެދުކަނޑަލަން ވެސް ޖެހިގެން ގޮސްފައިވެއެވެ.
