ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) ރައީސް މޫސާ ނާޝިދުއާ ގުޅުންހުރި ތަންތަން ބަލާ ފާސްކުރަން ފަށައިފިއެވެ.
ބީއޭއެމްގެ ރައީސްއާ ގުޅުން ހުރި ތަންތަން ބަލާ ފާސްކުރަން ފަށާފައި ވަނީ އެންޓި ކޮރަޕްޝަން ކޮމިޝަނުން ތަހުގީގުކުރަމުން އަންނަ މައްސަލައަކާ ގުޅިގެންނެވެ.
އެގޮތުން ނާޝިދުއާ ގުޅުން ހުރި ތަންތަން ބަލާ ފާސްކުރަމުން އޭސީސީއިން ގެންދަނީ ކޯޓު އަމުރެއްގެ ދަށުން އެ ކޮމިޝަނުން ހާމަކޮށްފައިވެއެވެ.
މިކަމާ ގުޅިގެން މީގެ ކުރިން އޭސީސީން ބުނީ، ބެޑްމިންޓަން އެސޯސިއޭޝަން އޮފް މޯލްޑިވްސްއަށް ރައްދުވާގޮތަށް ހުށަހެޅިފައިވާ ކޮރަޕްޝަނާ ގުޅުންހުރި، ގިނަ ތުހުމަތުތަކަކާ ގުޅިގެން ލިޔެކިޔުމާއި މަޢުލޫމާތު ހޯދުމަށް ކޮމިޝަނުގެ ތަޙުޤީޤު ޓީމެއް އެ އެސޯސިއޭޝަނުގައި ޙަރަކާތްތެރިވާން ފަށާފައިވާ ކަމަށެވެ.
އެކަމަކު، އެ މައްސަލައާ ގުޅޭ ތަފުސީލެއް އޭސީސީން ހާމަކޮށްފައެއް ނުވެއެވެ.
މައުލޫމާތު ލިބިފަިއވާ ގޮތުގައި، އެ އެސޯސިއޭޝަނަށް އެއްޗެހި ގަތުމުގައި އޭނާގެ މަސްލަހަތު އޮންނަ ވިޔަފާރިތަކުން ތަކެތި ގަތުންފަދަ ގިނަ މައްސަލަތަކަކާއެކު އޭނާގެ މައްޗަށް ކޮރަޕްޝަންގެ ތުހުމަތު ބައެއް ފަރާތްތަކުން ވަނީ ކޮށްފައެވެ.
އޭސީސީން ބެޑްމިންޓަން އެސޯސިއޭޝަންގެ ރައީސްއާއި ގުޅުންހުރި ތަންތަން ބަލާ ފާސަކުރަމުން ދާއިރު، 22 މާރިޗު 2024ވަނަ ދުވަހަށް ތާވަލުކުރެވުނު ބެޑްމިންޓަން އެސޯސިއޭޝަނުގެ އަހަރީ ޢާންމު ޖަލްސާގެ ކަންކަން ކުރިއަށް ގެންދާނެ އެކަށިގެންވާ މާޙައުލެއް އޮތްކަމަށް އެ އެސޯސިއޭޝަނަށް ނުފެންނާތީވެ, އަހަރީ އާންމު ޖަލްސާ ފަސްކުރެވިފައިވާ ކަމަށް އެ އެސޯސިއޭޝަންއިން އިއްޔެވަނީ ބުނެފައެވެ.
