ރާއްޖެއަށް ތައާރަފުކުރި އެއާރ އެމްބިއުލަންސާ އެކު، އިންޑިއާ އިން ހަދިޔާކޮށްފައިވާ ކަމަށް ބުނާ ހެލިކޮޕްޓަރުގެ ބޭނުން ނެތިގެން ހިނގައްޖެ ކަމަށާ އެހެންކަމުން ދެން އިތުރަށް އެ ހެލިކޮޕޓަރު ބެލެހެއްޓުމުގެ ނަމުގައި މަދަނީ މީހުންވެސް ބައިތިއްބަން ޖެހޭތޯ އައްސަވާ ރައީސް އަބްދުﷲ ޔާމީންގެ ވަރުގަދަ ސުވާލެއް ދިވެހި ސަރުކާރަށް އަމާޒުކުރައްވައިފިއެވެ.

ރައީސް ޔާމީންގެ މި ސުވާލު އަމާޒުކުރެއްވީ ރައްޔިތުންގެ މަޖިލިހަށް ޕީއެންއެފްގެ ފަރާތުން ނުކުންނަ ކެނޑިޑޭޓުންގެ ސިޔާސަތުތައް ހާމަކުރުމަށް ދަ ފްރޮންޓު އޮފީހުގައި ބާއްވާ ސިލްސިލާ ފޯރަމުންގެ ތެރެއިން އަންގާރަ ދުވަހުރޭ ބޭއްވި ފޯރަމުގައެވެ.

ރައީސް ޔާމީން ވަނީ، މީގެ ކުރިން ބުނަމުން ގެންދިޔައީ އިންޑިއާ ސިފައިންނާ އަދި މިހާރު މަދަނީ މީހުންވެސް ބައިތިއްބަނީ އިންޑިއާ އިން ހަދިޔާ ކޮށްފައި އޮތް ހެލިކޮޕްޓަރު ބަލަހައްޓަން ކަމަށާ އެ ހެލިކޮޕްޓަރާ އަދި ޑޯނިޔާއަކީ ވެސް މެޑިކަލް އިވެކުއޭޝަންއަށް ބޭނުންކުރާ ވސީލަތްތައް ކަމަށްވާއިރު މިހާރު ރާއްޖޭގައި ރާއްޖޭގެ މީހުން އޮަރޭޓުކުރާނެ އެއާރ އެމްބިއުލަންސެއް ތައާރަފްކުރެވިފައިވާކަން ފާހަގަކުރައްވާފައެވެ.

ރައީސް ޔާމީން ވަނީ، އިންޑިއާ ސިފައިން ބާލާނެ ކަމަށް ރައީސް މުހައްމަދު މުއިއްޒު ވެވަޑައިގެންނެވި ވައުދު ބަދަލުކޮށް މަދަނީ މީހުން މިހާރު ހެލިކޮޕޓަރު ބަލަހައްޓަން ބައިތިއްބަން ސަރުކާރުން އެއްބަސްވެފައިވާވުމާ މެދު ކަންބޮޑވުން ފާޅުކުރައްވާ ސަރުކާރާމެދު ނުރުހުންވެސް ފާޅުކުރައްވާފައެވެ.