ނިމިދިޔަ އިބްރާހިމް މުހައްމަދު ޞާލިހްގެ ފަސް އަހަރުގައި،އެޔެއް މިޔެއް ނުބަލާ މުވައްޒަފުން ވައްދައި ފުރާލީ ފެނަކައިގެ އޮފީސްތަކެވެ. އިންތިހާބުތަކުގެ ތެރޭގައި ފެނަކައިން ވަޒީފާ ބަހާ، ޖަމާއަތް ހަދާ މީހުން ވައްދާފައިވާ ވާހަކަ ދައްކަން ތާހިރުހެއްޔެވެ.

ސަރުކާރުގެ ކުންފުނި ފެނަކައިގައި ތިބީ ކިތައް މުވައްޒަފުންކަން ވެސް އިބުރާހިމަކަށް ނޭނގުނެވެ. އެހެންތާވާނީ ނުކަތާ ވަރަށް ޖެހުނު މީހަކު ދަމާފައި ފެނަކަ އަށް ވެއްދީމާ، 2023 ވަނަ އަހަރުގެ ރިޔާސީ އިންތިޚާބް ކާމިޔާބުކުރުމަށްޓަކައި ފެނަކައިން ވަޒީފާތައް ބަހާލީ އެއްވެސް ވަރަކަށް ބެލުމެއްނެތިއެވެ.

އޭރު އެ ކުންފުނީގެ މެނޭޖިންގ ޑިރެކްޓާރ ސައީދުގެ ވާހަކަ ގެންނަން ހަމަގައިމުވެސް މަޖުބޫރެވެ. 5 އަހަރުުގެ ޖެހިހާ ސަކަރާތެއް ޖަހާ ނިންމާފައި، މުޅި ފެނަކަ ބަނގުރޫޓުކޮށްފައި މިއަދު ދެ އަތް އުރާލައިގެން ހުންނާތީ ހަމަ ހައިރާންވެއެވެ.

ވެރިކަން ކާމިޔާބު ވެގެން އޭރު ޖެހިހާ ސަކަރާތަކަށް ފަސް އަޅާފައި ފޮރުވާލެވޭނެ ކަމުގެ ފޮނި އުންމީދުގައި ހުއްޓާ ރިޔާސީ އިންތިޚާބުން ލިބުނީ ބޮޑު ސުމެކެވެ. ދެން އެ ކުޅުނު ނާޗަރަންގީ އެއް ހުރީ ކުންފުނީގައެވެ.

އައު މެނޭޖްމެންޓް އައިސް ފެނަކަ ކުންފުންޏާ ހަވާލުވިރު، އަސްތާ ކަމަކުދާކަށްނެތެވެ. ފެނަކައަށް މިއޮތީ ހަދާނެ އެއްޗެއް ހަދާ ނިންމާފައެވެ.

ފެނަކަ ކުންފުންޏަކީ ރާއްޖޭގެ ގިނަ ރަށްރަަށަށް ފެނާއި ކަރަންޓްެގެ ހިދުމަތް ފޯރުކޮށްދޭ ކުންފުންޏެކެވެ. މިފަދަ ބޮޑެތި ކަންކަން ކުރާ ކުންފުނީގެ ހާލަތު މިހާ ދަށަށް ދިޔައީ ނިމިދިޔަ ސަރުކާރުގެ އިހުމާލުންނެވެ.

ކުންފުނީގެ ދަރަނީގެ ގޮތުގައި 871 މިލިއަން ރުފިޔާ އެބައޮތް ކަމަށް މިހާރުު އެ ކުންފުނީގެ މެނޭޖިންގް ޑިރެކްޓާރ، މުއާޒް މުހައްމަދު ރަޝީދު ވަނީ ވިދާޅުވެފައެވެ.

ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަން 2018 ވަނަ އަހަރު ނިމުނުއިރު އެ ކުންފުނީގައި މަސައްކަތްކޮށްްފައިވަނީ 2756 މުވައްޒަފުންނެވެ. ނަމަވެސް އިބްރާހިމް މުހައްމަދު ޞާލިހް ވެެރިކަން ނިންމާފައި ތަހުތުން ފޭބިއިރު ފެނަކައިގައި ޖުމްލަ 8126 މުވައްޒަފުން މަސައްކަތްކުރެއެވެ. 5 އަހަރު ތެރޭ ވެރިކަމުގެ ދަހިވެތިކަމުގައި 5370 މުވައްޒަފުން ވަނީ އެ ކުންފުންޏަށް އިތުރުކޮށްފައެވެ.

އެ ކުންފުނިން މިދިޔަ އަހަރުގެ ޑިސެމްބަރު މަހު ހާމަކުރި ޕްރެސެންޓޭޝަނުން އެނގޭ ގޮތުގައި އާބާދީ މަދު ރަށްރަށުގައި އޮފީސް އިމާރާތެއް އަޅަން ވެސް 80 ވަރަކަށް މުވައްޒަފުން ނަގާފައިވާކަމަށް ދައްކައެވެ.

ދެން އޮތްކަމަކީ އެ ކުންފުނިން ހިންގާ ޕްރޮޖެކްޓްތަކުގެ ވާހަކައެވެ. ނިމިދިޔަ ސަރުކާރުގައި 25 ޕްރޮޖެކްޓެއް ކުންފުންޏަށް ގެއްލުންވާގޮތައް ހިންގާފައިވާތީ އެންޓި ކޮރަޕްޝަން ކޮމިޝަން އިން ވަނީ އެ މައްސަލަ ވެސް ބަލަން ފަށާފައެވެ.

މިކަން ހިއްސާކޮށް މިހާރު އެކުންފުނީގެ މެނޭޖިން ޑިރެކްޓަރ މުއާޒު މުހައްމަދު ރަޝީދު ވަނީ އެކްސްގައި ޕޯސްޓެއްކުރައްވާފައެވެ. މި ޕްރޮޖެކްޓުތަކަކީ ކުންފުންޏަށް އިންތިހާއަށް ގެއްލުންވާ ގޮތަށް، ބީއޯކިއުއެއް އަދި މާކެޓުގައި މި މަސައްކަތްތައް ކުރެވޭނެ އަގަށް ބެލުމެއްނެތި ހަވާލުކޮށްފައިވާ ޕްރޮޖެކްޓުތަކެއް ކަމަށް މުއާޒް ފާހަގަކޮށްފައިވެސްވެއެވެ.


އޭސީސީއަށް ހުށަހެޅި ޕްރޮޖެކްޓުތަކުގެ ތެރޭގައި މައިގަނޑު ގޮތެއްގައި ހިމެނެނީ އިންޖީނުގެއާ ކުރުމާއި ރީ-ލޮކޭޓުކުރުމާއި ފެނަކަ އޮފީސް އިމާރާތް ކުރުމުގެ މަޝްރޫއުތަކެވެ.

މީގެ ގިނަ މަޝްރޫއުތަކަށް ފައިސާ ނުދެވި މަސައްކަތް ވަނީ ހުއްޓިފައެވެ. އެ މަޝްރޫއުތަކަށް އެކަނި އެއް ބިލިއަން ރުފިޔާ ހަރަދުކޮށްފައިވާ ކަމަށާއި މި ކަމުގައި ބޮޑު ހިޔާނާތެއް އެކުލެވޭ ކަމަށް ވެސް މުއާޒް ތުހުމަތުކުރެއެވެ.

މިއަދު ޕޯޑިއަމްތަކަށް އަރާފައި މިކިޔަނީ ފެނަކަ ބަނގުރޭޓޭ، ފެނަކަ ބަނގުރޫޓުކޮށްލި ފަރާތްތަކުން މިވާހަކަތައް ދައްކަން ލަދުގަންނަން ޖެހޭނެ ނޫންތޯ؟