މޫދަށް އެރިއުޅުނު ފަތުރުވެރިއެއްގެ މުދާ ފޭރިގަތް މައްސަލައެއް ތަހުގީގު ކުރަން ފުލުހުން ފަށައި ތުހުމަތު ކުރެވޭ މީހާ ވެސް މިހާރު އައިޑެންޓިފައި ކޮށްފިއެވެ.

ފުލުހުންގެ ތަރުޖަމާން އަހުމަދު ޝިފާން އެކްސް ގައި ކުރި ޕޯސްޓެއްގައި ވިދާޅުވެފައިވަނީ މި މައްސަލަ ތަހުގީގުކުރަމުން ދާކަމަށެވެ.

އަދި އެކަން ކުރި ކަމަށް ތުހުމަތު ކުރެވޭ މީހާ ވެސް މިހާރު އައިޑެންޓިފައި ކޮށްފައިވާ ކަމަށެވެ.

ފަތުރުވެރިޔާގެ ދަބަސް ފޭރުނު ގޮތް ކިޔާދޭ ވީޑިއޯއެއް ސޯޝަލް މީޑިއާގައި ދައުރުވަމުން ދާއިރު އެ ވީޑިއޯގައި އެ ފަތުރުވެރިޔާ ގޮނޑުދޮށުގައި ޑްރޯންއެއް އަރުވަން ހުއްޓާ ފުރާވަރުގެ ދެ ފިރިހެން ކުއްޖަކު އެ ތަނަށް ގޮސް އެ ޑްރޯންގެ އަގާ އެއްޗެހި އެހުމައް ފަހު ދެތިން މިނެޓެއް އެކުދިންނާ ވާހަކަ ދެއްކުމަށް ފަހު ފަތުރުވެރިޔާ ޑްރޯން ތިރިކޮށްފައި އޭނާ މޫދަށް އެރުނީ ކަމަށް ބުނެއެވެ.

އަދި މޫދަށް އެރުނީ އޭނާގެ ޑްރޯން އާއި ދެ ދަބަސް އޭނާ ދުއްވަން ގެންގުޅުނު ސައިކަލުގެ ކައިރީގައި ބަހައްޓާފައި ކަމަށެވެ.

އަދި އެއް ދަބަސް އެއީ ޑްރޯން ލާން ގެންގުޅޭ ކަޅުކުލައިގެ ދަބަހެއް ކަމަށާއި އަނެއް ދަބަހަކީ އުނަގަނޑުގައި އަޅުވާ ދަބަހެއް ކަމަށާއި އެ ދަބަހުގެ ތެރޭގައި އެ ފަތުރުވެރިޔާގެ ވޮލެޓް އާއި މޮބައިލް ފޯން އޮންނާނެކަމަށް ވެސް އެ ފަތުރުވެރިޔާ ވަނީ ބުނެފައެވެ.

އެ ދަބަހުގެ ތެރޭގައި އޭނާ ވޮލެޓާއި ކްރެޑިޓް ކާޑުތަކާއި 200 ޑޮލަރާއި 1،500ރ. އާއި އެކި ލިޔެކިޔުންތަކާއި ފޯނާއި ސައިކަލުގެ ދަޅުގަނޑި ވެސް އޮންނާނެ ކަމަށް އެ ފަތުރުވެރިޔާ ބުނެއެވެ.