މާލޭ ސަރަހައްދުގައި ގާއިމުކުރާ ބައިނަލްއަގްވާމީ ޕޯޓު ދުބާއި ވޯލްޑަށް ވިއްކާލަން މި ސަރުކާރުން އުޅޭތީ އެކަމާ ރައީސް އަބްދުﷲ ޔާމީންގެ ފާޑުކިޔުން އަމާޒުކުރައްވައިފިއެވެ.

ޕީއެންއެފްގެ ފަރާތުން ރައްޔިތުންގެ މަޖިލީހުގެ އިންތިހާބުގައި ވާދަ ކުރައްވާ ކެންޑިޑޭޓުންގެ ސިޔާސަތުތައް ހާމަކުރުމަށް ބާއްވާ ޖަލްސާތަކުގެ ތެރެއިން އާދިއްތަ ދުވަހުގެ ރޭ ބޭއްވި ޖަލްސާގައި ރައީސް ޔާމީން ވަނީ ތިލަފުށީ ބަނދަރު ނުވަތަ ބިން ދުބާއީ ވޯލްޑަށް މި ސަރުކާރުން ވިއްކާލަން އުޅޭ ފަދަ މަންޒަރުތަކެއް ފެންނަމުން ދާ ކަމަށާ އެކަމާ ކަންބޮޑުވެ ވަޑައިގަންނަވާ ކަމަށް ވިދާޅުވެފައެވެ.

ރައީސް ޔާމީން ވިދާޅުވީ ކިރިޔާ އިގްތިސޯދުގެ ކުޑަ މިންވަރެއް އެނގޭ މީހަކު ނަމަވެސް އެކަން އެ ގޮތަށް ނުކުރާނެ ކަމަށާ ދުބާއީ ވޯލްޑަށް މާލެ ޕޯޓު ވިއްކާލައިގެން ހިންގަން އުޅެނީ އިގްތިސޯދީ ބޮޑު ޖަރީމާ އެއް ކަމަށެވެ.

ރައީސް ޔާމީން ވިދާޅުވީ ދުބާއި ވޯލްޑަށް ބައިނަލްއަގްވާމީ ޕޯޓު ދިނުމަކީ ޖީއެމްއާރަށް އެއާޕޯޓު ދިނުން ފަދަ ކަމެއް ކަމަށެވެ. އަދި އެމަނިކުފާނު ވިދާޅުވީ ކޮޗިންގައި މިހާރުވެސް ރާއްޖޭގެ ޕޯޓަށް ވުރެ ބޮޑު ޕޯޓެއް ދުބާއީ ވޯލްޑިއިން އަޅާފައި އެބައޮތް ކަމަށާ އެހެންކަމުން ރާއްޖޭގައި އެ ފުރުސަތު ދުބާއީ ވޯލްޑަށް ދީފިނަމަ ރާއްޖެ ވެގެން ދާނީ ކޮޗިންގައި އޮތް ޕޯޓުގެ ސެޓެލައިޓަކަށް ކަމަށްވުމުން އެމަނިކުފާނު އެ ފުރުސަތު އޭރު ނުދެއްވީ ކަމަށެވެ.