މަސްތުވާތަކެތީގެ ބާވަތެއް ކަމަށްވާ ކެނަބިސް ހިމެނޭ ވޭޕް ވިއްކާ މައްސަލަތަކެއް ތަހުގީގު ކުރަމުން އަންނަ ކަމަށް ފުލުހުން ބުނެފި އެވެ.
އެނގިފައިވާ ގޮތުގައި ރާއްޖެ އަށް ކެނަބިޑިއޯލް (ސީބީޑީ) އާއި ޓެޓްރަހައިޑްރޯ ކެނަބިނޯލް (ޓީއެޗްސީ) ވޭޕްތައް އެތެރެކޮށް އޭގެ ވިޔަފާރި ކުރަމުންދާތާ ދުވަސްތަކެއް ވެއްޖެ އެވެ. އެ ވިޔަފާރި ކުރަމުންދާ އެއް ގޮތަކީ ޓެލެގްރާމް ޗެނަލްތައް ހަދައިގެންނެވެ. އަދި 500ރ. އާއި 5000ރ. އާ ހަމައަށް ވިއްކަން އެބަ ހުއްޓެވެ.
ފުލުހުންގެ މީޑިއާ އޮފިޝަލް ވިދާޅުވީ މަސްތުވާތަކެތި ހިމެނޭ ވޭޕް ވިއްކަމުންދާ ކަން ފާހަގަ ވެގެން އޮޕަރޭޝަންތަކެއް ހިންގާފައިވާނެ ކަމަށެވެ. މިދިޔަ އަހަރާއި މި އަހަރުގެ ތެރޭގައި ވެސް ބައެއް އޮޕަރޭޝަންތައް ހިންގި ކަމަށް އޮފިޝަލް ވިދާޅުވި އެވެ.
އެފަދަ މައްސަލަތައް ތަހުގީގުކޮށް، އިތުރަށް ބަލަން ޖެހޭ ކަންކަން ދަނީ ބަލަމުން
ފުލުހުންގެ މީޑިއާ އޮފިޝަލް
ރާއްޖޭގައި ވޭޕް ބޭނުން ކުރުން ވަނީ ވަރަށް އާންމުވެފައެވެ. ހާއްސަކޮށް ޒުވާނުންނާއި ކުޑަ ކުދިން ވޭޕް ބޭނުން ކުރާ ވަރު މިފަހަކަށް އައިސް ވަނީ ވަރަށް ބޮޑަށް އިތުރުވެފައެވެ. އެ މައްސަލާގައި ޓޮބޭކޯ ކޮންޓްރޯލް ބޯޑުން އަންނަނީ ވޭޕް މަނާ ކުރަން ސަރުކާރަށް ލަފާ ދިނުމަށް ކަރުދާހެއް ތައްޔާރު ކުރުމުގެ މަސައްކަތް ކުރަމުންނެވެ.
