ހުޅުމާލޭގައި ހޯމަ ދުވަހުގެރޭ ދުއްވާފައި ދިޔަ ސައިކަލެއް ހުއްޓުވަން ފުލުހުން ކުޑަކުއްޖެއްގެ ގައިގައި ޖެހި ކަމަށް ބުނުމުން އެކަން ފުލުހުން ދޮގުކޮށްފައިވަނިކޮށް އާންމުވި ވީޑީއޯއަކުން ފެންނަ މަންޒަރުތަކުން، ފުލުހުން އަނިޔާކުރިކަން ހާމަވެއްޖެއެވެ.
ހޯމަ ދުވަހުގެ ރޭ 10 ޖަހާ އެހާކަށްހާއިރު ހުޅުމާލޭ ފޭސް 2ގައި ހިނގި އެ ހާދިސާގައި، ސައިކަލުގައި ތިބި މީހުންގެ ގައިގައި ޖެހި ކަމަށް ބުނެ، އެ ސަރަހައްދުގައި އެ މައްސަލަ ވަރަށް ބޮޑަށް ހޫނުވިއެވެ. ސައިކަލު ފަހަތުގައި އިން 18 އަހަރު ނުވާ އަންހެން ކުއްޖާގެ ބެލެނިވެރިން ވަނީ ހުޅުމާލޭ ފޭސް 2 ގެ ޕޮލިސް ސްޓޭޝަން ދޮސުގައި ނުރުހުން ފާޅުކޮށް އަޑު ގަދަވެސް ކޮށްފައެވެ. އަދި ފުލުހުން އެކަން އެހެން ނުކުރާނެ ކަމަށް ބުނުމުން އެ ސަރަހައްދުގެ ސީސީޓީވީ ފޫޓޭޖު ދެއްކުމަށް ބުނުމުން ނުދެއްކުމުން މައްސަލަ ވަރަށް ބޮޑަށް ހޫނުވެފައިވެއެވެ.
މި ހާދިސާއާ ގުޅިގެން ސޯޝަލް މީޑިއާގައި ފުލުހުންނަށް ފާޑުކިޔުން އަމާޒުވެފައިވަނިކޮށް ޗެނަލް13 އިން ކުރި ސުވާލަކަށް ޖަވާބު ދެއްވަމުން ފުލުހުންގެ މިޑީޔާއިން ވިދާޅުވީ، އެއީ ކަނޑައެޅިގެން ދޮގެއް ކަމަށާ ފުލުހުން އެއްވެސް މީހަކަށް އަނިޔާނުކުރާނެ ކަމަށެވެ. އަދި އެކަން ހިނގަން ދިމާވި ގޮތަކީ ހުޅުމާލޭ ފޭސް 2 ގައި ފުލުހުން ގާއިމުކޮށްފައި ހުރި ވެހިކަލް ޗެކް ޕޮއިންޓަކަށް އަރާ ހަމަވުމުން ސައިކަލް އެކްސަލެރޭޓުކޮށް ޗެކް ޕޮއިންޓުގެ ފަހަތުގައި ތިބި ފުލުހުން ގައިން ނައްޓާ ކުރިއަށް ދިއުމަށް އުޅުމުގެ ތެރޭގައި ވެއްޓިގެން ކަމަށާ ސައިކަލް ދުއްވަން އިނީ ލައިސަންސް ނެތް މީހެއް ކަމަށް ފުލުހުން ހާމަކޮށްފައިވެއެވެ.
ނަމަވެސް އަންގާރަ ދުވަހުގެ ރޭ މީސް މީޑިޔާގައި އާންމުވި ވީޑިއޯއަކުން ފެންނަ ގޮތުގައި އާންމުކޮށް ދުއްވާ ވަރަށް ވުރެ ބާރަށް ދުއްވާފައި އައި ސައިކަލެއް ހުއްޓުވުމަށް ޗެކްޕޯސްޓުގައި ހުރި ފުލުސް އޮފިސަރު މަސައްކަތް ކުރެއެވެ. އަދި އެ ފުލުސް އޮފިސަރު އަތުގައި ވެހިކަލް ހުއްޓުވުމަށްޓަކައި ސިގްނަލް ދޭ އާލާތެއް އޮތްއިރު އެ އާލާތުގައި ޖެހިފައި ސައިކަލުގައި ތިބި ދެ މީހުން ވެއްޓޭ މަންޒަރު ފެނިގެން ވެސް ދެއެވެ.
މިކަމާ ގުޅިގެން ފުލުހުންގެ ތަރުޖަމާނު ޗީފް ސުޕްރިންޓެންޑެންޓް އޮފް ޕޮލިސް އަހުމަދު ޝިފާން ވިދާޅުވީ އެ ހާދިސާއާ ގުޅިގެން ފުލުހުންގެ އެތެރޭގެ ތަހުގީގެއް ހިންގުމަށް އެ އިދާރާ އިން މިހާރު ނިންމާފައިވާ ކަމަށެވެ.
