"ރައިޒް އަޕް"ގެ ނަމުގައި ޒުވާނުންގެ ބޮޑު ހަރަކާތެއް ބާއްވަން ނިންމައިފިއެވެ.
ޒުވާނުންތަކެއްގެ އަމިއްލަ އިސްނެގުމާ އެކު ބާއްވާ މި ހަރަކާތް އޮންނާނީ 21 ނޮވެމްބަރު 2025 ވާ ހުކުރު ދުވަހުގެރޭ ހުޅުމާލޭ ފޭސް 2ގެ ހިޔާ ޓަވަރު 12 އާ ދިމާލުގައި ކަމަށް އެ ހަރަކާތް އިންތިޒާމުކުރާ ފަރާތްތަކުން މައުލޫމާތު ދީފައިވެއެވެ. ހަރަކާތް ފަށާނީ އެރޭ 08:30 ގައެވެ.
މި ހަރަކާތަކީ މިހާރު ގައުމުގެ މިސްރާބު ހުރި ގޮތާ މެދު ޒުވާނުންގެ ޝުއޫރުފާޅުކުރުމަށް ބާއްވާ ހަރަކާތެއް ކަމަށާ ހަރަކާތުގައި ޚާއްސަ މެހެމާނެއްގެ ގޮތުގައި ޕީއެންއެފްގެ ރައީސް، ރައީސް އަބްދުﷲ ޔާމީން ބައިވެރިވެވަަޑައިގެން ވާހަކަފުޅު ދައްކަވާނެ ކަމަށް ވެސް ހާމަކޮށްފައިވެއެވެ.
މި ހަރާކަތް އިންތިޒާމުކޮށް ހިންގާ ޒުވާނުން މައުލޫމާތު ދީފައިވާ ގޮތުގައި މި ހަރަކާތް ކުރިއަށް ދާނީ ބޮޑުބެރުގެ ހަރަކާތްތަކާ އަދި ބާބަކިއުއަކާ ވެސް އެކުއެވެ.
އެހެންކަމުން ވީހާ ވެސް ގިނަ ރައްޔިތުން މި ހަރަކާތުގައި ބައިވެރިވުމަކީ އެ ޒުވާނުންގެ ވަރަށް ބޮޑު އެދުމެކެވެ.
މީގެ ކުރިންވެސް ހުޅުމާލެ ފޭސް ދޭއްގައި ބޭއްވި ބާބަކިއު ހަރަކާތެއްގައި ރައީސް ޔާމީން ބައިވެރިވެވަޑައިގެންނެވިއިރު އެމަނިކުފާނަށް އޮތް ލޯތްބާ ތާއީދު ރައްޔިތުން ނިކުމެ ދައްކާލާފައިވެއެވެ.
