ނިމިދިޔަ އިބްރާހިމް މުހައެްމަދު ޞާލިހްގެ 5 އަހަރުގެ ވެރިކަމުގައި ސިޔާސީ ބޭނުމުގައި އެތައް ފަރާތެެއް ވަނީ ހައްޔަރުކޮށް، އަނިޔާކޮށް އިހާނެތިވެފައެވެ.

މިއީ ދައްކާ ދައްކާވެސް ނިމުނު ވާހަކައެއް ނޫނެވެ. 2023 ވަނަ އަހަރުގެ ރިޔާސީ އިންތިޚާބު ކާމިޔާބު ކުރުމަށްޓަަކައި ރައީސް އަބްދުﷲ ޔާމީން އަބްދުލްގައްޔޫމް ފްރޭމްކޮށް އިއްވީ ނުހައްގު ޖަލު ހުކުމެކެެވެ. އެ ހުކުމަށް ގިނަ ފަރާތްތަކުން ކިިޔާ އުޅުނީ ސިޔާސީ ހުކުމް، ހަރާން ހުކުމް ފަދަ ނަން ނަމެވެ. މިފަދަ ނަން ނަން އޭރު އެ ހުކުމަށް ކިޔަން ޖެހުނީ ވެސް ސަބަބެެއްނެތި ނޫނެވެ.

ރައީސް ޔާމީންގެ ކުށެއް ނެތި ފަތި ފައްޗަށް ސިޔާސީ ދައުވާތަކެއް އެމަނިކުފާނުގެ މައްޗަށް އުފުލައި، ނުހައްގު ޖަލު ހުކުމްތަކެއް ކުރީ ސިޔާސީ ބޭނުންތަކަށް ކަން މިއަދު ރައްޔިތުންނަކަށް ނޯޅޭނެއެވެ. އެއީ ރައީސް ޔާމީން ނުކުރައްވާ ކަންކަން އެމަނިކުފާނުގެ މައްޗަށް އުފުލާފައިވާ ދައުވާތަކާއި ޖަލު ހުކުމްތައް ޝަކުވާއެއް ނެތި، އަދި ބަހަނާއެއް ނެތި އެމަނިކުފާނު ތަންފީޒުކުރައްވަމުން ގެންދަވާއިރު، ކުރީ ސަރުކާރުން ރުހޭ މީހުން ކަމުގައިވާނަމަ ކިތަންމެ ބޮޑު ކުށްވެރިޔަކަށް ވެސް މައާފުދީ ލުއިދީފައި ވެއެވެ.

ރިޔާސީ އިންތިޚާބަށް ކުށްވެރިންނަށް މައާފު ދީ މިނިވަންކޮށްފައިވެއެވެ، މިއީ ވެސް ސިޔާސީ ބޭނުމުގައި ކޮށްފައި ހުރި ކަންކަމެވެ.

ގާނޫނުން ބޭރުން، އިސްލާމީ ޝަރީއަތުން ގަބޫލުނުކުރެވޭނެ ބޮޑެތި ކުށްވެރިން، ހެކިންގެ ގޮތުގައި ރައީސް ޔާމީނާ ދެކޮޅަށް ޞާލިހްގެ ސަރުކާރުން ބޭނުންކޮށްފައިވާއިރު، އެ ކުށްވެރިންގެ އަދަބުތައް ވެސް ވަނީ އެތައް ފަހަރެއްގެ މަތިން ލުއިކޮށްދީފައެވެ. އެމްއެމްޕީއާރުސީގެ ޚިޔާނާތުގައި މޭސްތިރިއެއްގެ ގޮތުގައި އެންމެނަށް އެނގޭ އަދި ދައުވާތަކަށް އިއުތިރާފުވެފައިވާ ކުރީގެ ނައިބު ރައީސް އަހުމަދު އަދީބު އާއި އެމްއެމްޕީއާރުސީގެ އޭރުގެ އެމްޑީ އަބްދުﷲ ޒިޔަތު އޭގެ ހެއްކަކަށް ފުދޭނެއެވެ.

އިޔާދަވަނީ އަނިޔާވެރިކަމުގެ ސިލްސިލާ ކަމަށާއި އަނިޔާވެރި ނުވެވެސް ހިދުމަތް ކުރެވޭނެ ކަމަށް ރައީސް ޞާލިހް ވިދާޅުވުމުން އަންނަނީ ހިންޏެވެ. މިއީ އަޅެ ކާކުހެއްޔެވެ؟ މި ވެރިޔާގެ ލަދުގެ ކަންފުޅެއްވެސް ނެތީހެއްޔެވެ؟ ހައިރާންވެ އަންތަރީސްވެއްޖެއެވެ. އަނިޔާވެރި ނުވެ ހިދުމަތް ކުރެވޭނެ ކަމަށް ވިދާޅުވި ވެރިޔާގެ ވެރިކަމުގައި ވީ އޯގާތެރިހެއްޔެވެ؟

މިއަދު އެހާ ފޯރިތަކެއް އަރުވާލައިގެން މިއުޅެނީ އެވެރިޔާގެ ވެރިކަމުގައި ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) ތެރެއިން ހިނގި ބޮޑު ހިޔާނާތުގެ މައްސަލަ ފުލުހުންގެ ހިދުމަތުން ތަހުގީގު ކުރަމުން ދަނިކޮށް އެ ފައިސާ އަމިއްލަ ބޭނުމަށް ކުރީގެ އިކޮނޮމިކް މިނިސްޓަރ އަދި އެމްޑީޕީ ގެ ޗެއާރ ޕާސަން ފައްޔާޒް އިސްމާއިލް ބޭނުންކުރިކަމަށް އަޑުތައް އަރައިގެން ގޮސް އޭނާ ފުލުހަށް ހާޒިރުކުރަން ނިންމުމުންނެވެ. ވެރިކަމުގައި ހޭވި ހަޑިތައް އުތުރި އަރާފައިނެތީ ދެފައި ކައިރިކޮށްލައިގެން މިއަދު ހުންނަން ރައީސް ޞާލިހައް ދަތިވަނީ ކަންނޭނގެއެވެ.

ރައީސް އިބްރާހިމެވެ. ސިޔާސީ ބޭނުމޭ ކިޔާފައި މިއަދު ވާހަކަ ދައްކަވަން ލަދު ނުގަންނަނީހެއްޔެވެ؟ މަނިކުފާނަކީ ސިޔާސީ ބޭނުމުގައި އެންމެ އަނިޔާވެރިވި ވެރިޔާއެވެ. އެ ފަސް އަހަރު ހެކިވާނެއެވެ. ދިވެހި ރައްޔިތުން ހެކިވާނެއެވެ. އެހެންވީމާ ދެން މިއަދު ބުއްދިވެރިވާނީ މަނިކުފާނު ހަނު ހުރުމެވެ.