ރައީސް ޑރ. މުހައްމަދު މުއިއްޒުގެ ސަރުކާރުން ރައީސް އަބްދުﷲ ޔާމީން މިނިވަންކުރަން ވީ ވައުދު ނުފުއްދާ އުޅެނީ އެމަނިކުފާނު މިނިވަންވެވަޑައިގެންފި ނަމަ މިހާރު ސަރުކާރު ތެރެއިން ހިންގާ ކޮރަޕްޝަންތައް ހުއްޓުވާނެކަމުުގެ ޔަގީން ސަރުކާރުގެ ވެރިންނަށް އޮތުމުން ކަމަށް، ޕީއެންއެފްގެ ޓިކެޓުގައި 20 ވަނަ ރައްޔިތުންގެ މަޖިލިހަށް ހެންވޭރު ދެކުނު ދާއިރާ ތަމްސީލުކުރުމަށް ވާދަކުރާ ކެންޑިޑޭޓު އަހުމަދު މުހައްމަދު (ނިޝާން) ވިދާޅުވެއްޖެއެވެ.

މަޖިލިހަށް ޕީއެންއެފް ޓިކެޓުގައި ވާދަކުރާ ކެންޑިޑޭޓުންގެ ސިޔާސަތުތައް ހާމަކުރުމަށް ދަ ފްރޮންޓު އޮފީހުގައި ބާއްވަމުން ގެންދާ ޖަލްސަތަކުގެ ތެރެއިން އާދިއްތަ ދުވަހުގެ ރޭ ބޭއްވި ޖަލްސާގައި ނިޝާން ވިދާޅުވީ، މި ސަރުކާރުގެ ތެރޭގައި މިވީ ކުޑަ ދުވަސްކޮޅުގެ ތެރޭގައި ކޮރަޕްޝަންގެ މޫތައް ވަކި ހިއްޕާލައިފި ކަމަށާ އެގޮތުން ސަރުކާރާ ސަރުކާރުގެ މަދަދު ގާރުން ގެންދަނީ ފާޅުގައި ކޮރަޕްޝަން ހިންގާކަމަށް އެއްބަސްވަމުން ކަމަށް ވެސް ނިޝާނު ވިދާޅުވިއެވެ. އަދި އެކަންކަން ސަރުކާރު ތެރެއިން ނުހުއްޓުވާނެ ކަމާ އެކަމުގެ ހެއްކަކީ ރައީސް ޔާމީން މިނިވަން ނުކުރުން ކަމަށް ވެސް ނިޝާން ވިދާޅުވިއެވެ.

ނިޝާން ވިދާޅުވީ ރައީސް ޔާމީން މިނިވަންކޮށްފި ނަމަ އެމީހުން މިހާރު ހިންގާ ޖަރީމާތައް ނުހިންގޭނެކަން އެމީހުންނަށް ރަގަޅަށް އެނގޭތީ ރައީސް ޔާމީން މިނިވަންނުކޮށް ހިފަހައްޓަނީ ކަމަށެވެ.

އެންމެ ފުރަތަ ވީ ވައުދު ރައީސް ޔާމީން މިނިވަންކުރުމަކީ. ނަމަވެސް އެ ވައުދު ނުފުއްދާ އެ ހިފަަހއްޓަނީ ސަރުކާރު ތެރެއިން ހިންގަމުން ގެންދާ ބޮޑެތި ޖަރިމާތައް، ކޮރަޕްޝަން ފަދަ ކުށްތައް ރައީސް ޔާމީން ހުއްޓުވާނެކަން އެމީހުންނަށް ޔަގީން ވާތީ

ނިޝާން

ދިވެހި ރައީސަކަށް އެންމެ ބޮޑު ޒިންމާއަކީ ރައްޔިތުންނަށް ތެދުވެރިވުން ކަމަށްވީ ނަމަވެސް ރައީސް މުއިއްޒުގެ ފަރާތްޕުޅުން ފެނިގެން ދަނީ ކަންކަން ސިއްތުކުރަމުން ގެންދާ މަންޒަރު އެއީ ދެފުށް ފެންނަ ސަރުކާރަކުން ކުރާނެކަމެއް ނޫން ކަމަށް ނިޝާން ވިދާޅުވިއެވެ.