ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް)އަށް ރައީސް ޑރ. މުހައްމަދު މުއިއްޒު ހެވެއް ނޭދޭނެ ކަމަށް ރައީސް އަބްދުﷲ ޔާމީން ވިދާޅުވުމުން، މުއިއްޒު އަންގަވައިގެން މުޅި ސަރުކާރު ޑިފެންސަށް ފައިބައިފިއެވެ.

ރައީސް އޮފީހުގެ އިސް އޮފިޝަލަކު ނަން ނުޖެހުމަށް ޝަރުތުކޮށް ޗެނަލް13އަށް މައުލޫމާތު ދިން ގޮތުގައި ރައީސް މުއިއްޒު ޕީޕީއެމްއަށް ދިރުމެއް ދޭން މިހާރު ބޭނުންނުވާ ކަމަށް ރައީސް ޔާމީން ވިދާޅުވެފައިވާ ވުމަށް ރައްދު ދިނުމަށް ރައީސް މުއިއްޒު ވަނީ މުޅި ކެބިނެޓަށް އަމުރުކޮށްފައެވެ.

އެގޮތުން ޕީއެންއެފްގެ ފަރާތުން ރައްޔިތުންގެ މަޖިލީހުގެ އިންތިހާބުގައި ވާދަ ކުރައްވާ ކެންޑިޑޭޓުންގެ ސިޔާސަތުތައް ހާމަކުރުމަށް ބާއްވާ ޖަލްސާތަކުގެ ތެރެއިން އާދިއްތަ ދުވަހުގެ ރޭ ބޭއްވި ޖަލްސާގައި ރައީސް ޔާމީން ވަނީ މިފަހަރުގެ މަޖިލީހަށް ޕީޕީއެމްގެ ނަމުގައި މެމްބަރުކަމަށް ވާދަކުރަން ރައީސް މުއިއްޒު ފުރުސަތު ނުދެއްވިކަން ފާހަގަކުރައްވާފައެވެ.

އެގޮތުން މިހާރުވެސް ޕީޕީއެމްގެ ދަފްތަރުގައި ތިއްބެވި މަޖިލީހުގެ ދެ މެމްބަރުން ކަމަށްވާ އަހުމަދު ސަލީމުއާ އަހުމަދު ތޯރިގުއަށް މަޖްބުރު ކުރުވައިގެން ޕީއެންސީ ނަމުގައި މި ފަހަރު މަޖިލީހަށް ވާދަކުރުވާ ކުރުވުމުން ފެނިގެން ދަނީ ޕީޕިއެމް ފަސްއަޅާ ވަޅުލަން ސަރުކާރުން ކުރާ މަސައްކަތް ކަމަށް ރައީސް ޔާމީން ވިދާޅުވިއެވެ.

މީގެ އިތުރުން ޕީޕީއެމްގައި ތިބި ލޮބިވެތި މެމްބަރުންނަށް އޮޅުވާލާ އެ މެމްބަރުން ލައްވާ ޕީއެންސީއަށް ސޮއިކުރުވާ ރައީސް މުއިއްޒު ހިންގެވީ ޖަރީމާއެއްކަން ރައީސް ޔާމީން ފާހަގަކުރެއްވިއެވެ.

ރައީސް ޔާމީންގެ މި ވާހަކަފުޅުތަކާ އެކު ރައްޔިތުންނަށް ހަގީގަތް ހާމަވެ ރައްޔިތުންގެ ލޯ ހުޅިވިގެން ދާތީ އެކަމާ ކަންބޮޑުވެ ވަޑައިގެން ގޮތް ހުސްވެވަޑައިގެން ރައީސް މުއިއްޒު ވަނީ އިއްޔެގެ ވަގުތެއްގައި މުޅި ކެބިނެޓަށް އެ ވާހަކަފުޅަށް ރައްދު ދިނުމަށް އަމުރުކޮށްފައެވެ.

އެ އަމުރާ ގުޅިގެން ސަރުކާރުގެ އިސް ވަޒީރު އަބްދުއްރަހީމު އާ ފިޝަރީޒް މިނިސްޓަރު އަދި ޕީޕީއެމްއާ އަޅާނުލާ އެ ޕާޓީ މަގުމަތިވާން ދޫކޮށްލާފައިވާ ކަމަށް ގިނަ ބަޔަކު ގަބޫލުކުރާ އެ ޕާޓީގެ ނައިބު އަހުމަދު ޝިޔާމްއާ، ހެލުތު މިނިސްޓަރު އަބްދުﷲ ޚަލީލުއާ އެލްޖީއޭ މިނިސްޓަރު އާދަމް ޝަރީފު އުމަރާ އަދި އެ ޕާޓިއާ އިހުމާލުވަމުންދާ އެ ޕާޓީގެ އަނެއް ނައިބު، މި ސަރުކާރުގެ ޑިފެންސް މިިނިސްޓަރު ޣައްސާން މައުމޫނުގެ އިތުރުން އިކޮނޮމިކު މިނިސްޓަރު މުހައްމަދު ސައީދު ވެސް ރައީސް ޔާމީނަށް ރައްދު ދިފައިވެއެވެ.

ސަރުކާރުގެ އިސް ބޭފުޅުން މައި ގަނޑު ގޮތެއްގައި ދެއްވި ރައްދުގައި ވިދާޅުވެފައިވަނީ ރައީސް ޔާމީން ޕީޕީޢެމް ދޫކުރައްވާ ވަޑައިގެންނެވި ވާހަކައެވެ. އަދި ޕާޓީއާ މެމްބަރުންނަށް ހެވެއް އެދިވަޑައިގަންނަވާ ނަމަ އެހެން އެކަން ނުކުރައްވާނެކަމަށެވެ.

އެ ބޭފުޅުންގެ މި ރައްދަށް ޖަވާބު ރައީސް ޔާމީން ވަނީ މާކުރިން ދެއްވާފައެވެ. އެގޮތުން ރައީސް ޔާމީން ޕާޓީއިން ނުކުމެވަޑައިގެންނެވީ ޕާޓީއަށް އެމަނިކުފާނުގެ ބަސް ނުހިނގާ އެމަނިކުފާނުގެ އިރުޝާދަށް ތަބާ ނުވުމުން ކަން އެމަނިކުފާނު ހާމަކުރައްވާފައިވެއެވެ.