ރައްޔިތުންގެ މަޖިލިސް އިންތިހާބާ ގުޅޭ އަށް މައްސަލައެއް ތަހުގީގު ކުރަމުންދާ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފިއެވެ.

މިކަމާ ގުޅިގެން އޭސީސީއިން ހާމަކޮށްފައިވާ ގޮތުގައި، މަޖިލިސް އިންތިހާބާ ގުޅޭ ގޮތުން ލިބިފައިވާ މައްސަލަތަކުގެ ތެރެއިން އަށް މައްސަލައެއް ރަޖިސްޓްރީކޮށް، ތަހުގީގު ވަނީ ފަށާފައެވެ.

އެ މައްސަލަތަކުގެ ތެރޭގައި ހިމެނެނީ ދައުލަތުގެ ވަސީލަތްތައް ބޭނުން ކޮށްގެން ކެމްޕެއިނު ކުރުމާއި، ކެމްޕެއިނު ކުރުމުގައި ރިޝްވަތު ހުށަހެޅުމުގެ އިތުރުން އިންތިހާބުގައި ވާދަކުރާ ކެންޑިޑޭޓުންގެ ހައްގަށް އުނިކަން ލިބޭ ގޮތަށް ކެމްޕެއިނު ކުރުމުގެ މައްސަލަތަކެވެ.

މަޖިލިސް އިންތިހާބާ ގުޅިގެން މިހާތަނަށް 10 މައްސަލައެއް އޭސީސީއަށް ހުށަހަޅާފައިވެއެވެ.

މަޖިލިސް އިންތިހާބާ ގުޅޭ ކަރަޕްޝަންގެ މައްސަލައެއް ފާހަގަ ކުރެވޭނަމަ، އެ މައްސަލައެއް އޭސީސީއަށް ހުށަހެޅުމަށް ވެސް އޭސީސީން ވެސް އިލްތިމާސްކޮށްފައިވެއެވެ.

މައްސަލަ ހުށަހަޅާނީ އިންތިހާބާ ގުޅޭ ޕޯޓަލް މެދުވެރިކޮށެވެ.

ރައްޔިތުންގެ މަޖިލިސް އަންނަ އެޕރިލް މަހުގެ 21 ވަނަ ދުވަހު ބާއްވަން މިހާރު ނިންމާފައިވާއިރު ހުރިހާ ކެންޑިޑޭޓުންވެސް ގެންދަނީ ވަރަށް ފޯރިއާ އެކު ކެމްޕެއިނު ކުރަމުންނެވެ. މި އިންތިހާބުގައި 369 ކެންޑިޑޭޓުން ވާދަކުރެއެވެ. އޭގެ ތެރޭ ހިމެނެނީ 326 ފިރިހެން ކެންޑިޑޭޓުން 43 އަންހެން ކެންޑިޑޭޓުންނެވެ.

އެހެން އަހަރުތަކާ ޚިލާފަށް މިއަހަރު 93 ދާއިރާއަކަށް މެންބަރުން އިންތިހާބު ކުރެވޭނެއެވެ.