ސަރުކާރުގެ ފަރާތުން ކަންކަން ހާމަކުރުމަށް ނޫސްވެރިންނާ ބައްދަލު ނުކުރާތާ 2 މަހައްވުރެ ގިނަ ދުވަސްވެއްޖެއެވެ.

ދެ މަސް ވެފައިވަނީ މިދިޔަ ހަފްތާގެ ބުރާސްފަތި ދުވަހަށެވެ.

ރައީސް އޮފީހުން އެންމެ ފަހުން ނޫސްވެެރިންނާ ބައްދަލުކޮށްފައިވަނީ ޖެނުއަރީ މަހުގެ 28 ވަނަ ދުވަހުއެވެ.

އެދުވަހު ބޭއްވުނު ކެބިނެޓް ބައްދަލުމުގެ ނިންމުންތަކާ ބެހޭގޮތުން ވާހަކަދައްކަވާފައިވަނީ ރައީސް އޮފީހުގެ ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުﷲ ނާޒިމް އިބްރާހީމެވެ.

ނާޒިމް އާންމުގޮތެއްގައި ބާއްވާ ނޫސްވެރިންގެ ބައްދަލުވުންތަކުގައި ޖަވާބުދެނީ ކެބިނެޓް ބައްދަލުވުންތަކުގެ ނިންމުންތަކާ ބެހޭގޮތުންނެވެ. އެކަމާ ނުގުޅޭ ސުވާލެއް ނޫސްވެރިން ކުރުމުން އެކަމަށް ނާޒިމް ޖަވާބެއް ނުދެއްވައެވެ.

ރައީސް އޮފީހުގެ އިސް ތަރުޖަމާނެއް ނެތްތާ ވެސް ވަރަށް ދުވަސް ވެއްޖެއެެވެ. އެންމެ ފަހުން އެ މަގާމްގައި ހުންނެވީ މުހައްމަދު ޝަހީބެވެ. ނަމަވެސް އައު އަހަރު ފެށުމާއެކު ޝަހީބު ވަނީ ހާރިޖީ ވުޒާރާގެ ސްޓޭޓަކަށް އައްޔަންކުރައްވާފައެވެ.

ރައީސް އޮފީހުގެ ތަރުޖަމާނަކު ނެތިގެން ނޫސްވެރިން ސުވާލުތައް ކުރަމުން ގެންދާއިރު އެ މަގާމަށް މީހަކު އައްޔަންކުރައްވާނެ ކަމަށް ރައީސް އޮފީހުގެ ބައެއް މިނިސްޓަރުން ވިދާޅުވައެވެ. ނަމަވެސް މިހާތަނަށް އެކަން ކުރައްވާފައި ނުވެއެވެ.

ހާމަކަންބޮޑު ސަރުކާރެއްގެ ގޮތުގައި ދައުވާ ކުރާއިރު ސަރުކާރުގެ ގިނަ ކަން ކަން ހުރީ ފޮރުވިފައެވެ.