ރައްޔިތުންގެ މަޖިލީހުގެ އިންތިހާބާ ގުޅިގެން ސްކޫލު ކުދިންގެ އިމްތިހާނު އަވަސް ކުރަން ކުރިން ނިންމި ނަމަވެސް، އެއަށް އަމަލު ނުކުރައްވާނެ ކަމަށް ސަރުކާރުން ބުނެފިއެވެ.

ތާރިހަށް އައި ބަދަލާއެކު ރައްޔިތުންގެ މަޖިލިސް އިންތިޚާބް ބޭއްވުމަށް ހަމަޖެހިފައިވަނީ އޭޕްރިލް މަހުގެ 21 ވަނަ ދުވަހުއެވެ.

އެ ދުވަސްވަރަކީ ސްކޫލްތަކުގެ ދަރިވަރުންގެ އިމްތިޚާނު ބާއްވާ ދުވަސްތަކެެއް ކަމުން، ސަރުކާރުން ވަނީ އިމްތިޚާން ކުރީ ބައިގައި ބާއްވަން ނިންމާފައެވެ.

ސިޔާސީ ބޭނުމަކަށްޓަކައި ސަރުކާރުން ދަރިވަރުންގެ އިމްތިޚާން އަވަސްކުރުމުން ގިނަ ބެލެނެވެރިންގެ ނަފްރަތާ ފާޑުކިޔުން ސަރުކާރަށް އަމާޒުވަމުން ދަނިކޮށް ރައީސް ޑރ.މުހައްމަދު މުއިއްޒު ވަނީ ކުރިން ނިންމެވި ގޮތް ބަދަލުކޮށްފައެވެ.

ތައުލީމާ ބެހޭ ވަޒީރާ ވާހަކަ ދައްކަވައިން ބެލެނެވެރިން އަދި ދަރިވަރުންގެ މަޝްވަރާ އެއް ނެތި އެކަން ނުކުރައްވާނެ ކަމަށް ރައީސް މުއިއްޒު ވަނީ ވިދާޅުވެފައެވެ.

މީގެ ކުރިން މަޖިލިސް އިންތިޚާބް ބާއްވަން ހަމަޖެހިފައި ވަނީ މާޗް 17 ވަނަ ދުވަހަށެވެ. ނަމަވެސް އެ ދުވަހަކީ ރަމަޟާން މަހުގެ ދުވަހެއް ކަމުން މަޖިލީހުގެ އަގުލަބިއްޔަތު އޮންނަ އެމްޑީޕީން ވަނީ އިންތިޚާބް އޮންނަ ތާރީހް ބަދަލު ކުރުމަށް އެދިފައެވެ.

ރައީސް މުއިއްޒު ވަނީ ފުރަތަމަ ފަހަރު އެ ބިލް ފޮނުވުމުން ތަސްދީގް ނުކުރައްވާ އަނބުރާ މަޖިލީހަށް ފޮނުވާލާފައެވެ. ނަމަވެސް ދެވަނަ ބުރަށް ބިލް ފޮނުވުމުން އެމަނިކުފާނަށް ވަނީ އިންތިޚާބް އޮންނަ ދުވަސް ބަދަލުކުރުމަށް މަޖުބޫރުވެފައެވެ.