ގިނަ މީހުން ބޭނުންވަނީ މަޖިލިސް މެންބަރުން މަދު ކުރަންކަން ހާމަވެއްޖެއެވެ.

މިކަން ހާމަވެފައިވަނި ހިއުމަން ރައިޓްސް އޮފް ދި މޯލްޑިވްސް (އެޗްއާރުސީއެމް)އިން ކުރިއަށް ގެންދިޔަ ސާވޭއަކުންނެވެ.

އަންނަ މަހުގެ 21 ވަނަ ދުވަހު ބާއްވާ ރައްޔިތުންގެ މަޖިލީހުގެ އިންތހާބާ ގުޅިގެން އާންމުންގެ ހިޔާލު ހޯދުމަށް އެ ކޮމިޝަނުން ކުރިއަށް ގެންދިޔަ ދިރާސާގެ މައުލޫމާތު އާންމުކޮށްފައިވާއިރު، ދިރާސާގައި ބައިވެރިވި 68 އިން ސައްތަ މީހުން ދެކޭ ގޮތުގައި މެންބަރުންގެ އަދަދު މަދުކުރަން ޖެހެއެވެ.

މިހާރު މަޖިލީހުގައި 80 މެމްބަރުން ތިބޭއިރު، މެންބަރުންގެ އަދަދު މަދުކުރަން ޖެހޭ ކަމަށް އެންމެ ބޮޑަށް ގަބޫލުކުރަނީ 56 އަހަރުން މަތީގެ މީހުންނެވެ. މިހާރު ތިބި އަދަދާ މެދު ހިތްހަމަ ޖެހެނީ 18 އަހަރާއި 25 އަހަރާއި ދެމެދު އުމުރުފުރާގެ މީހުންނެވެ.

އަންހެނުންގެ ދައުރާ މެދު ދެކޭގޮތަށް ބަލާއިރު، މިހާރު މަޖިލީހުގެ އަންހެނުން މަދުކަމަށް 68 އިންސައްތަ މީހުން ގަބޫލުކުރެއެވެ. ދިރާސާގެ 9 އިންސައްތަ މީހުން އަންހެނުން މަޖިލީހުގައި ތިބެން ޖެހޭ ކަމަށް ގަބޫލުނުކުރެއެވެ.

އެ ދިރާސާގެ ބައިވެރިންގެ 75 އިންސައްތަ، ގަބޫލުކުރާ ގޮތުގައި ވަކި ޖިންސަކަށް ވީތީ ކެންޑިޑޭޓެއް އިހުތިޔާރު ކުރުމުގައި ތަފާތުކުރުމެއް ގެންގުޅެން ނުޖެހެއެވެ. އަދި 16 އިންސައްތަ ފިރިހެން ކެންޑިޑޭޓުން އެ ދާއިރާ ތަމްސީލުކުރަން އިހުތިޔާރު ކުރާއިރު އަންހެން މެންބަރުން އިންތިހާބު ކުރަން ބޭނުންވާ ނިސްބަތަކީ ނުވަ އިންސައްތައެވެ.

މާރޗު 1 އިން 9 އަކަށް ކުރިއަށް ގެންދިޔަ ދިރާސާގައި 1174 މީހުން ބައިވެރިވިއެވެ. އެއީ 642 އަންހެނުންނާއި 532 ފިރިހެނުންނެވެ.