ވެލާނާ އިންޓަނޭޝަނަލް އެއާޕޯޓުން ބްރިޖަށް އަރަން ދިޔަ ޓެކްސީއަކުން، އެ ސަރަހައްދުގެ ޓްރެފިކް ބަލަހައްޓަން ހުރި ފުލުހެއްގެ ގައިގައި ޖެހި އެކްސިޑެންޓެއް ހިނގައިފިއެވެ.
ބާރު ސްޕީޑުގައި ދުއްވާފައި ދިޔަ ޓެކްސީއެއް ކޮންޓްރޯލުން ނެއްޓި މަގުގެ މެދުގައި ހުރި ޓްރެފިކް ބަަލަހައްޓަން ހުރި ފުލުހެއްގެ ގައިގައި ޖެހުނެވެ. ޓެކްސީން ޖެހުމާ އެކު އޭނާ ވިއްސައިގެން ގޮސް ވެއްޓޭތަން އާންމުވެފައިވާ ވީޑިއޯއަކުން ފެނެއެވެ.
ފުލުހުންގެ ތަރުޖަމާނު އަހުމަދު ޝިފާން ވިދާޅުވީ އެކްސިޑެންޓުވި ފުލުސް މީހާގެ ހާލު ރަނގަޅު ކަމަށެވެ. އޭނާ ވިދާޅުވީ ކާރު ދުއްވަން އިން މީހާ ހައްޔަރުކޮށް، މައްސަލަ ތަހުގީގު ކުރަމުން އަންނަ ކަމަށެވެ.
ބްރިޖާއި މާލެ ސަރަހައްދުގައި ނުރައްކާތެރި އެކްސިޑެންޓްތައް ހިނގަމުން ދިޔަ ނަމަވެސް އެކްސިޑެންޓްތަކާ ގުޅިގެން މީހުން ހައްޔަރުކުރުމަކީ ވަރަށް މަދުން ނޫނީ ނުފެންނަ ކަމެކެވެ.
ސޯޝަލް މީޑިއާގައި ދައުރުވަމުންދާ ވީޑިއޯއިން ފެންނަ ގޮތުގައި ބްރިޖަށް އެރުމަށް މަސައްކަތް ކުރި ޓެކްސީ، ހުޅުމާލޭ ހައިވޭގައި ސައިރަން އަޅައިގެން ދުއްވާފައި ދިޔަ ފުލުހުންގެ ކާރަކުން ސަލާމަތްވުމަށް އެ ޓެކްސީގެ މިސްރާބު ބަދަލުކުރާ މަންޒަރެވެ. ނަމަވެސް ޓެކްސީގެ މިސްރާބު ބަދަލުވުމުން ކޮންޓްރޯލުން ނެއްޓި ފުލުސް މީހާގެ ގައިގައި ޖެހުނެވެ.
ފުލުހުން އާންމުކޮށްފައިވާ، ރޯދަ މަހުގެ ފުރަތަމަ ދެ ހަފުތާގެ ތަފާސްހިސާބުތައް ދައްކާ ގޮތުން އެކްސިޑެންޓްގެ 86 ކޭސް ރިޕޯޓު ކޮށްފައި ވާއިރު، އެއީ މާލޭގައި ހިނގި 48 އެކްސިޑެންޓާއި ހުޅުމާލޭގައި ހިނގި 38 އެކްސިޑެންޓެވެ. އެކްސިޑެންޓްތައް އެންމެ ގިނައިން ހިނގާފައި ހުރީ ހަވީރު ވަގުތު އެވެ. ބްރިޖް އަދި ހައިވޭ އެކްސިޑެންޓްގެ ނުވަ މައްސަލަ ވެސް ޕޮލިހަށް ރިޕޯޓުކޮށްފައިވެ އެވެ.
