2023 ވަނަ އަހަރުގެ ރިޔާސީ އިންތިޚާބްގައި ރައީސް އަބްދުﷲ ޔާމީން އަބްދުލްގައްޔޫމްގެ ރަނިންގ މޭޓަކަށް އެމަނިކުފާނުގެ އިސް ގާނޫނީ ވަކީލް ޑރ.މުހައްމަދު ޖަމީލް އަހްމަދު ގެ ނަން ޖެހުމުން އެކަމާ ހިތްހަމަ ނުޖެހިގެން އިންތިޚާބް ބޮއިކޮޓް ކުރީ އަދުރޭ ކަން ހާމަވެއްޖެއެވެ.

މިކަން ހާމަވެފައިވަނީ ރައީސް އޮފީހުގެ ކުރީގެ ޗީފް އޮފް ސްޓާފް އަހްމަދު މުސްތަފާ އެކްސްގައި ކުރެއްވި ޕޯސްޓަކުންނެވެ.

އެގޮތުން 30 ޖުލައި 2023 ވަނަ ދުވަހު ޑރ ޖަމީލް ރަނިންގް މޭޓަކަށް ހަމަޖެއްސުމުން އެކަމާ ހިތްހަމަނުޖެހުނީ އަދުރޭ ކަމަށާއި ރަނިންގް މޭޓަކަށް ވާން ބޭނުންވީ އަދުރޭ ކަމަށްވެސް އެ ޕޯސްޓްގައި ވަނީ ބުނެފައެވެ.

ރަނިންގް މޭޓަކަށް އަދުރޭ އަމިއްލަ ނަން ޖަހައިގެން އުޅުއްވި މަންޒަރު އޭރު ރައީސް ޔާމީންގެ ކެމްޕެއިން މެނޭޖާރ އަދި މިހާރުގެ ޓްރާންސްޕޯޓް މިނިސްޓަރ މުހައްމަދު އަމީނަށާއި އަދުގެ ނައިބު ރައީސް ހުސައިން މުހައްމަދު ލަތީފަށްވެސް ފެނިވަޑައިގަންނަވާނެ ކަމަށް އެ ޕޯސްޓްގައި ވަނީ ފާހަގަކުރައްވާފައެވެ.

މިކަމާ ގުޅިގެން ޗެނަލް 13 އިން ވަނީ މި ދެބޭފުޅުންގެ ވެސް ބަހެއް ހޯދޭތޯ މަސައްކަތް ކޮށްފައެވެ، ނަމަވެސް އަދި އެއްވެސް ޖަވާބެއް ލިބިފައިނުވެއެވެ.

އަދުރޭ އަންނަނީ ރިޔާސީ އިންތިޚާބް ބޮއި ކޮޓް ކުރަން ރައީސް ޔާމީން ވިދާޅުވިކަމަށް ބުނެ ދޮގުވާހަކަތައް ދައްކަވަމުންނެވެ. ހަގީގަތުގައި އިންތިޚާބް ބޮއި ކޮޓް ކުރަން ބޭނުންވީ އަދުރޭ ކަމަށް ގިނަ ފަރާތްތަކުން ބުނެއެވެ.

އަދުރޭ ބޭނުންވަނީ އަދުރޭ ވެރިކަން ކުރަން ކަމަށާއި އޭނާގެ ނުފޫޒު މި ގައުމަށް ފޯރުވަން ކަމަށްވެސް ސޯޝަލް މީޑިޔާގައި ގިނަ ފަރާތްތަކުން ބުނެއެވެ.