ރައީސް އަބްދުﷲ ޔާމިން އަބްދުލްގައްޔޫމް މިނިވަންކުރަން ރައީސް މުއިއްޒު ކުރެއްވި މަސައްކަތެއް ނޯންނާނެ ކަމަށް ރައީސް ޔާމީން ވިދާޅުވެއްޖެއެވެ.
ރައީސް ޔާމީން މިފަދައިން ވިދާޅުވެފައިވަނީ އާދިއްތަ ދުވަހުގެ ރޭ ފްރޮންޓް އޮފީހުގައި އޮތް ޖަލްސާއެއްގައި ކެންޑިޑޭޓަކާ ސުވާލު އަމާޒުކުރައްވަމުންނެވެ.
އެގޮތުން ރައީސް ޔާމީން ވިދާޅުވީ، އެމަނިކުފާނު މިނިވަން ކުރަން މިހާރުގެ ރައީސް ޑރ.މުއިއްޒު ކުރެއްވި އެއްވެސް މަސައްކަތެއް ނޯންނާނެ ކަމަށާއި އެމަނިކުފާނުގެ ޝަރީއަތް މިހާތަނަށް ވެސް ލަސްކުރީ މި ސަރުކާރުން އަތްބާނައިގެން ކަމަށެވެ.
އޭގެއިތުރުން އެމަނިކުފާނު ވިދާޅުވީ ސަރުކާރުގައި ވެރިންގެ ގޮތުގައި ތިބި މީހުން އެމަނިކުފާނު މިނިވަންވާން ބޭނުން ނުވާކަމަށެވެ.
ރައީސް ޔާމީން މިނިވަންވާން ބޭނުންވާނަމަ މުޒާހަރާ އެހާ ފަނޑުކޮށް އާދައިގެ ގޮތަކަށް ނުދާނެ ކަމަށް ވެސް ވިދާޅުވެ ރައީސް ޔާމީންގެ ފާޑުކިޔުން ސަރުކާރަށް ވަނީ އަމާޒުކޮށްފައެވެ.
މުއިއްޒު ކުރައްވާ މަސައްކަތެއް ނޯންނާނެ އަޅުގަނޑު މިނިވަން ކުރާކަށް. އަޅުގަނޑަށް އެނގިފައިހުރި ގޮތުން ވެއްޖިއްޔާ ސަރުކާރުގެ މަތީފަންތީން އަތްބާނައިގެން އަޅުގަނޑުގެ ޝަރީއަތް މިހާތަނަށް ވެސް ލަސްކުރީ. ހަމަ ސަރުކާރުން އަތް ބާނައިގެން ލަސްކުރީ. އެހެންވީމަ ޕީޕީއެމްގެ އާންމު މެންބަރުންނަށް ކަންކަން އޮޅުވާލަން އުޅޭނެ ކަމެއް ނެތް
ރައީސް އަބްދުﷲ ޔާމީން އަބްދުލްގައްޔޫމް
ރައީސް ޔާމީން އިތުރަށް ވިދާޅުވީ ސަރުކާރުން އުޅެނީ ޕީޕީއެމްގެ އާންމު މެމްބަރުންނަށް އޮޅުވާލަން ކަމަށެވެ.
ސަރުކާރުން ހިންގާ ޖަރީމާތަކުގެ ވާހަކަތައް ދައްކާނެ ކަމަށާއި އެވާހަކަތައް ދައްކައިގެން މާދަމާ ޖަލަށް ގެންދިޔަޔަސް މައްސަލައެއް ނެތް ކަމަށް ރައީސް ޔާމީން ވިދާޅުވިއެވެ.
