ވެރިކަމަށް އައުމަށްފަހު ހިނގާ ހިނގާހުރި އެއްވެސް މަޝްރޫޢުއެއް ހުއްޓާލާފައި ނުވާނެކަމަށް ވިދާޅުވެ ރައީސް ޑރ.މުހައްމަދު މުއިއްޒު އިތުރުފުޅުހައްދަވައިފިއެވެ.

ރައީސް މުއިއްޒު އެއްވެސް މަޝްރޫޢު އެއް ހުއްޓާލާފައި ނުވާނެ ކަމަށް ވިދާޅުވެފައި ވަނީ އަންގާރަ ދުވަހުގެ ރޭގަނޑު ހުޅުމާލޭ ދެވަނަ ފިޔަވަހީގައި އޮތް ޕީއެންސީ ކެންޑިޑޭޓެއްގެ ކެމްޕެއިން ހަރަކާތުގައި ވާހަކަދައްކަވަމުުންނެވެ.

އެގޮތުން އެމަނިކުފާނު ވިދާޅުވީ މަޝްރޫއުތައް ހުއްޓާލާފައިވަނީ މިދިޔަ ސަރުކާރުން ކަމަށެވެ.

ކުރީ ސަރުކާރުން ހުއްޓާލި މަސައްކަތްތަކާއި އިތުރު މަޝްރޫއުތަކާއެކު މިހާރު ސަރުކާރުން 527 މަޝްރޫއެއް ހިންގަމުންދާ ކަމަށް ރައީސް މުއިއްޒު ވިދާޅުވިއިރު ބައެއް ރަށްރަށުގައި އަޅަން ފަށާފައިވާ އެއާޕޯޓްތަކުގެ މަސައްކަތް އަދުގެ ސަރުކާރުން ވަނީ ހުއްޓާލާފައެވެ.

މިކަން ކަށަވަރުކޮށްދެއްވާފައިވަނީ ސަރުކާރު ހިންގާ ކޯލިޝަންގެ ސްޕޯކްސްޕާސަން ހީނާ ވަލީދެވެ.

ފ.މަގޫދޫ ގައި އަޅަން ފަށާފައިވާ އެއާޕޯޓްގެ މަސައްކަތް ނިމި ނިމި އޮއްވާ ރައީސް ގެ ކޮއްކޯފުޅު ނިލަންދޫ ދާއިރާގެ ގޮނޑިއަށް ވާދަކުރައްވާތީވެ، ސަރުކާރުން ވަނީ މަގޫދޫ އެއާޕޯޓްގެ މަސައްކަތް ހުއްޓާލުމަށްފަހު ނިލަންދޫގައި އެއާޕޯޓް އަޅަން ނިންމާފައެވެ.

މިކަމާ ގުޅިގެން މަގޫދޫ ރައްޔިތުން އަންނަނީ ސިލްސިލާގޮތެއްގައި އިހްތިޖާޖްތައްވެސް ކުރަމުންނެވެ.

މަގޫދޫ ކައުންސިލްގެ ރައީސް ޗެނަލް 13 އަށް މައުލޫމާތު ދެމުން ވިދާޅުވީ އެއާޕޯޓްގެ މަސައްކަތް ހުއްޓާލުމާ ގުޅިގެން އެ ކައުންސިލުން ރައީސް މުއިއްޒަށް ސިޓީއެއް ވެސް ފޮނުވާފައިވާނެ ކަމަށެވެ، ސަބަބަކީ އެ މަޝްރޫޢު ހުއްޓާލަފައި ވަނީ ކައުންސިލާ އެެއްވެސް މަޝްވަރާކުރުމެއް ނެތި ކަމަށާއި ހުއްޓާލި ސަބަބު ވެސް ސަރުކާރުން އެ ކައުންސިލަށް އަންގާފައިނުވާތީވެއެވެ.

ރައީސް މުއިއްޒު ކެމްޕެއިން ޖަލްސާތަކުގެ ޕޯޑިއަމްގައި މަޝްރޫއުތައް ނުހުއްޓާ ވާހަކަތައް ދައްކަވަމުން އިތުރުފުޅު ހައްދަވަމުން ގެންދަވާއިރު ސަރުކާރު ހިންގާ ކޯލިޝަންގެ ތަރުޖަމާނު އަންނަނީ ސަރުކާރުން މަގޫދޫ އެއާޕޯޓްގެ މަޝްރޫޢު ހުއްޓާލިކަމަށް ބުނަމުންނެވެ. އަދި އެކަން ކޮށްފައި ވަނީ ރައްޔިތުންނަށްޓަކައި ކަމަށްވެސް ހީނާ ވަނީ ވިދާޅުވެފައެވެ.

ރައްޔިތުންނަށް ލިބެން އޮތް ބޮޑު އުފަލަކުން ރައްޔިތުން މަހުރޫމް ވުމުން އެއީ ރައްޔިތުންނަޓަކައި ސަރުކާރުން ކުރި ކަމެއް ކަމަށް ހީނާ ވިދާޅުވަމުން ގެންދަވާތީ މަގޫދޫ ރައްޔިތުން އަދި ގިނަ ފަރާތްތަކުން އަންނަނީ ހީނާ އަށާއި ސަރުކާރަށް ފާޑުކިޔުން އަމާޒުކުރަމުންނެވެ.