ހއ. ދައްޕަރު ފިއްލަދޫ ކައުންސިލްގެ އިހުތިސާސްއިން ވަކިކޮށް, އެރަށުގައި ރިއަލް އެސްޓޭޓް ޓުއަރިޒަމް ތަރައްގީކުރާނެ ކަމަށް ވިދާޅުވެ ފަތުރުވެރިކަމާ ބެހޭ ވަޒީރު އިބްރާހިމް ފައިސަަލް ކުރި ޓުވީޓް ޑިލީޓް ކޮށްފިއެވެ.

އެގޮތުން ފައިސަލް އެކްސްގައި ކުރި ޕޯސްޓްގައި ވިދާޅުވީ ދައްޕަރުގައި ރިއަލް އެސްޓޭޓް ޓުއަރިޒަމްގެ ކޮންސެޕްޓް ގާއިމްކުރުމަށް މިސަރުކާރުން ނިންމާފައިވާ ކަމަށެވެ.

މީގެ ކުރިން ވެސް ކުރީ ސަރުކާރުގައި ފިއްލަދޫގެ އިހްތިސާސްގެ ތެރެއިން ދައްޕަރު ކުރީގެ ރައީސް އިބްރާހިމް މުހައްމަދު ޞާލިހް ވަނީ ގަރާރެއް 2021 ވަނަ އަހަރުގެ އޯގަސްޓު 29 ގައި ނެރެ ވަކިކޮށްފައެވެ.

އެކަމާ ފިއްލަދޫގެ ރައްޔިތުން ކަންބޮޑުވެ، ޕެޓިޝަންގައި ސޮއި ކުރުމަށްފަހު ވަނީ ރައީސް ޞާލިހަށް ހުށަހަޅާފައެވެ.

އެހެންކަމުން އިތުރުގޮތެއް ނެތިގެން ރައީސް ޞާލިހް ވަނީ ދައްޕަރު އަނބުރާ ފިއްލަދޫގެ އިހްތިޞާސްގައި 2021 ވަނަ އަހަރުގެ އޮކްޓޯބަރުމަހު ގެ 4 ގައި ހިމަނާފައެވެ.

މިނިސްޓާރ ފައިސަލް އެ ރަށުގައި ރިއަލް އެސްޓޭޓް ޓުއަރިޒަމް ގާއިމްކުރަން ނިންމެވި އިރު ގާނޫނު ބުނާގޮތުން, ޓޫރިޒަމް އެސްޓޭޓް ޑިވެލޮޕްމަންޓް ޕްރޮޖެކްޓެއްގެ ގޮތުގައި ކަނޑައެޅޭ ސަރަހައްދެއް ކުއްޔަށް ދެވޭނީ ހަމައެކަނި ސަރުކާރުގެ 100 ހިއްސާވާ ކުންފުންޏަކަށް އެކަނިންނެވެ.

ޓުއަރިޒަމާ ބެހޭ ގާނޫނުގައި ބުނެފައި ވަނީ:

‏(ހ) ދިވެހިރާއްޖޭގައި ޓޫރިސްޓް ރިޒޯޓު ހެދުމަށާއި އިންޓަގްރޭޓަޑް ޓޫރިޒަމްތަރައްގީކުރުމަށާއި ސަރުކާރުގެ ޓޫރިޒަމް ރިއަލް އެސްޓޭޓް ޑިވެލޮޕްމަންޓް ޕްރޮޖެކްޓްތައް ތަރައްގީކުރުމަށާއި ޕްރައިވެޓް އައިލެންޑް ތަރައްގީކުރުމަށް ކުއްޔަށް ދޫކުރާނެ ރަށްރަށާއި ބިންބިމާއި ފަޅުފަޅާއި، އަދި ޓޫރިސްޓް ހޮޓަލާއި ޓޫރިސްޓް ގެސްޓްހައުސްއާއި ޔޮޓު ބަނދަރު ހަދާނެ ތަންތަނާއި، ޓޫރިޒަމްގެ ބޭނުމަށް ތަރައްގީކުރެވޭ އެނޫންވެސް ތަންތަނާއި ސަރަހައްދުތައް ކަނޑައަޅާނީ، ރައީސުލްޖުމްހޫރިއްޔާއެވެ.

މިކަން މިހެން އޮތް އިރު ފަތުރުވެރި ކަމާބެހޭ ވަޒީރު މި މޭރަމުން ޕޯސްޓް ކުރުމުން ގިނަ ބަޔަކު އަންނަނީ ނުރުުހުން ފާޅުކޮށް ފައިސަަލް އަށް ފާޑުކިޔުން އަމާޒުކުރަމުންނެވެ.

ފިއްލަދޫ އިހްތިޞާޞް އިން ދައްޕަރު ވަކިކޮށް އެތަނުގައި ފަތުރުވެރިކަން ކުރިއެރުމަކީ އަބަދުވެސް ފިއްލަދޫ ރައްޔިތުން އެކަމާ ދެކޮޅު ހަދަމުން އަންނަ ކަމެކެވެ. ފިއްލަދޫ ރައްޔިތުން ބޭނުންވަނީ އެ ތަނުގައި ފަތުރުވެރިކަން ކުރިޔަށް ގެންދާއިރު ދައްޕަރު ފިއްލަދޫގެ އިހްތިޞާޞްގައި އޮތުމަށެވެ.