ރައްޔިތުންގެ މަޖިލީހަށް ސަރުކާރުގެ ފަރާތުން ވާދަކުރާ ކެންޑިޑޭޓުންނަކީ ކޮބައިކަން ސާފުކޮށްދިނުމަށް އެދުމުން ސަރުކާރު ކޯލިޝަންގެ ތަރުޖަމާނު އަދި މި ސަރުކާރުގެ އެންސްޕާގެ ސީއީއޯ ހީނާ ވަލީދު ރުޅި ގަދަ ވެއްޖެއެވެ.

 ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ވެރިކަން ކުރާ ޕީއެންސީގެ ކެންޑިޑޭޓުން ވާދަކުރަން ނިންމާފައިވަނިކޮށް ބައެއް ދާއިރާތަކުން، ސަރުކާރު ކެންޑިޑޭޓުންގެ ގޮތުގައި ތިން ހަތަރު ކެންޑިޑޭޓުން ކެމްޕެއިންކޮށް ބޯޑުތައް ޖަހަމުން ގެންދާއިރު އެ ދާއިރާތަކުގެ ރައްޔިތުންނަށް ވެސް ތިބީ ސަރުކާރު ކެންޑިޑޭޓަކީ ކޮބައިކަން ވަނީ ސާފުވާ ގޮތްނުވެ އޮޅުމެއްގެ ތެރޭގައެވެ.

އަންގާރަ ދުވަހު ޕީޕީއެމް/ޕީއެންސީއިން ބޭއްވި ނޫސްވެރިންގެ ބައްދަލުވުމުގައި މިކަމާ ގުޅިގެން ނޫސްވެރިޔަކު ވަނީ ސުވާލެއް އަމާޒުކޮށްފައެވެ.

ޖަވާބުގައި ހީނާ ވިދާޅުވީ ތިން ދާއިރާއަކަށް ފިޔަވައި ހުރިހާ ދާއިރާއަކަށް ޕީއެންސީ ކެންޑިޑޭޓުން ވާދަކުރާ ކަމަށާ ރައްޔިތުންނަށް އެއީ ކޮން ކެންޑިޑޭޓުންނެއްކަން ވަރަށް ސާފުކޮށް އެނގޭނެ ކަމަށެވެ.

ނަމަވެސް ރައްޔިތުން އެކަން ނޭނގޭ ކަމަށް ބުނެ ނޫސްވެރިޔާ ވަނީ ތަކުރާރުކޮށް އެކަން ސާފުކޮށްދިނުމަށް އެދިފައެވެ. ނޫސްވެރިޔާ އެ ސުވާލު ތަކުރާރުކުރުމުން ރުންކުރުކޮށް ރުޅިގަދަވެފައި ހުރެ ހީނާ ވިދާޅުވީ، ޕީއެންސީގެ ކެންޑިޑޭޓުން "ރައްޔިތުންނަށް އެނގިވަޑައިގަންނަވާނެ" ކަމަށެވެ. އަދި ހީނާ ވިދާޅުވީ، "އެ ސުވާލުގެ ޖަވާބު ދެއްވިއްޖެ" ކަމަށް ގަބޫލުކުރައްވާ ކަމަށެވެ.

ކެތްތެރި ހިތްތިރި ވެރިންތަކެއް ތިބި ސަރުކާރެއްގެ ގޮތުގައި ސަރުކާރުގެ ދިފާއުގައި ބަޔަކު ޓްވީޓުކުރާއިރު މިއީ ސަރުކާރު ހިންގާ ޕާޓީ ތަމްސީލުކުރާ ސްޕޯކްސްޕާސަންއެއްގެ ފަރާތުން ފެނުނު ލަދުވެތި މަންޒަރެއްގެ ގޮތުގައި ގިނަ ބަޔަކު ސިފަކުރެއެވެ.