މާލެ ސަރަހައްދަށް މި ދެ މަހުގެ ތެރޭގައި އެންމެ ހޫނުގަދަ ދުވަހެއްގައި ރެކޯޑް ކުރެވިފައިވަނި މިއަދުކަން ހާމަވެއްޖެއެވެ.
އެގޮތުން މެޓް އޮފީހުން އާންމު ކުރި މައުލޫމާތަށް ބަލާއިރު މިއަދު 11 ޖެހިއިރު މާލޭ ސަރަހައްދުގައި އިހުސާސްކުރެވޭ ހޫނުމިން 46.3 ޑިގްރީ ސެލްސިލަސްއަށް އެރި އެވެ. މިއީ ރެކޯޑް މިންވަރެކެވެ.
ރާއްޖޭގެ ހުރިހާ ހިސާބަކަށް މިދުވަސްވަރު ހޫނުގަދަވި އިރު، އެ ދުވަސްތަކުގައި އެވްރެޖުކޮށް ހުރީ 44-45 ޑިގްރީ ސެލްސިއަސްއާ ދެމެދުގައެވެ. އެއީ ވިލާ މަދުވުމާއި، ވައި މަޑުވުން އަދި ވައިގެ ތެތްކަން މަތިކޮށް ހިފެހެއްޓިފައި ހުރުމުންނެވެ.
އޭގެ އިތުރުން މި އަހަރަކީ "އެލްނީނޯ" އަހަރެއް ކަމަށް ވުމުން ހޫނުމިން އިތުރަށް މަތިވުމުގެ ފުރުސަތު އޮތްކަން ދުނިޔޭގެ މޫސުމާ ބެހޭ ޖަމިއްޔާއިން ލަފާކުރާކަމަށް މެޓްއިން ވިދާޅުވެފައި ވެއެވެ.
މިއަދުގެ ފިނި ހޫނުމިނަށް ބަލާއިރު ދެކުނުގެ އަތޮޅު ތަކަށްވުރެ މެދުރާއްޖެ އާއި އުތުރުގެ އަތޮޅުތަކަށް ހޫނުމިން ހުރީ 40 ޑިގްރީއަށްވުރެ މަތީގައެވެ.
