ވެރިކަމަށް އަދި 5 މަސް ރަނގަޅަށް ނުފުރޭއިރު ފެނިގެންދަނީ ބިރުވެރި މަންޒަރުތަކެކެވެ. ރައްޔިތުންނަށް ބިރުދައްކައިގެން ބަޔަކު އުޅުއްވާ މަންޒަރެވެ.

މި މަހުގެ 21 ވަނަ ދުވަހު އޮންނަ 20 ވަނަ ރައްޔިތުންގެ މަޖިލިސް އިންތިޚާބްގައި އެކި އެކި ދާއިރާތަކުން ކެންޑިޑޭޓުން ވާދަކުރައްވާއިރު، ފ.ނިލަންދޫ ދާއިރާއިން ވާދަކުރައްވަނީ ދެ ކެންޑިޑޭޓެވެ. އެއީ އަމިއްލަ ގޮތުން ވާދަކުރައްވާ އަހުމަދު ރަޝީދާ، ޕީއެންސީގެ ޓިކެޓްގައި ވާދަކުރައްވާ އަދުގެ ރައީސް ޑރ.މުހައްމަދު މުއިއްޒުގެ ކޮއްކޯފުޅު ފާތިމަތު ސައުދާއެވެ.

ކޮއްކޯފުޅަށް ތާއިދު ހޯދުމަށްޓަކައި މުޅި ނިލަންދޫއަށް ސަރުކާރުގެ ސިޔާސީ މަގާމްތައް ވަނީ ތަނބަކަށްލައި ބަހާފައެވެ. ނުވީތާކަށް ކޮއްކޯފުޅަށް ދާއިރާގެ ގޮނޑި ހޯދައިދިނުމަށްޓަކައި ހިނގާ ހިނގާ އޮތް މަޝްރޫޢުއެއް ވަނީ ހުއްޓާލާފައެވެ. އެއީ ފ.މަގޫދޫ އެއާޕޯޓެވެ. ނިލަންދޫގައި އެއާޕޯޓް އެޅުމަށްޓަކައި ރައީސް ނިންމެވި ނިންމެވުމަކީ ސީދާ ކޮއްކޯފުޅަށް އޭގެން ފައިދާއެއް ކުރަން ވެގެން ކުރެއްވި ކަމެއްކަމަށް މަގޫދޫގެ ރައްޔިތުން އަދި ކައުންސިލުންވެސް ބުނެއެވެ.

ކަންކަން މިހެން ހުރި އިރު، ދެން ފެނިގެންމިދިޔައީ "ނިލަންދޫ" އަށް ނިސްބަތްވާ އަދުގެ ސަރުކާރުގެ ހެލްތް މިނިސްޓާރ އަބްދުﷲ ހަލީލް ނިލަންދޫ އަށް ސައުދާގެ ކެމްޕެއިނަށް ވަޑައިގެން އަހުމަދު ރަޝީދަށް ތާއިދު ކުރައްވާ ގެޔެއްގެ ޖޯލީގައި ދުފާލައިގެން އޮވެ އިންޒާރުތަކުގެ ގޯނި އޮއްސާލި މަންޒަރެވެ.

ވިދާޅުވީ " ނިލަންދޫގެ ނަން ހިމަނައި، ރައީސް މުއިއްޒު ސޮއި ކުރައްވާފައިވާއިރު، ދޯކާއެއް ދެއްވާނެ ކަމަށް ޤަބޫލުނުކުރެވޭ" ކަމަށެވެ. އާދެ، ހަލީލް އެ ވިދާޅުވީ ނިލަންދޫ އެއާޕޯޓްގެ ވާހަކައެވެ.

ސައުދާއަށް ވޯޓު ނުދީ އަހުމަދު ރަޝީދަށް ވޯޓުތައް ދީފިނަމަ "އެ ދޯކާ، އެ ރަށު ރައްޔިތުންނަށް އަންނާނެ" ކަމަށް ވިދާޅުވެ މިނިސްޓަރ ހަލީލް ގެ އެ އިންޒާރުން ހަމަގައިމުވެސް ނިލަންދޫގެ ރައްޔިތުން ބިރުގަންނާނެއެވެ. އެ ރަށެއްގެ ތަރައްގީއަށް ހުރަސްއެޅޭނެ ފަދަ އެއްވެސް ކަމެއް އެ ރަށެއްގެ ރައްޔިތުން ކުރާކަަށް ބޭނުން ނުވާނެކަން ޔަގީނެވެ. މިކަން އެނގިހުރެ ސަރުކާރުން މި ފެށީ ސައުދާގެ ކެމްޕެއިންގައި ރައްޔިތުންނަށް ބިރުދައްކަންތާއެވެ.

"ރައީސް މުއިއްޒަށް ވަފާތެރިވަންޏާ، ނިލަންދޫގެ ރައްޔިތުންނަށް ފައިދާވާނެ" މިފަދައިން ހަލީލް ވިދާޅުވީމާ ދޭހަވީ އެންމެ ކަމެކެވެ. އެއީ އެމަނިކުފާނު އެދޭގޮތައް ސައުދާ އަށް ވޯޓު ނުދީފިނަމަ އެ ރަށު ރައްޔިތުން ނިކަމެތިކޮށްލާނެކަމެވެ.

ކެބިނެޓްގައި ނިލަންދޫ މީހެއް ހުރީތީ އެހެން ރަށްރަށަށް ވުރެ ނިލަންދޫ އަށް ބަލާނެ ކަމަށް ވިދާޅުވެ ހަލީލް ވަނީ ހިދުމަތްކުރުމުގައި އެހެން ރަށްރަށުގެ ރައްޔިތުން ބާކީކޮށްލާނެކަމަށްވެސް ނުސީދާ ގޮތަކަށް ވިދާޅުވެފައެވެ. މިއީ އެއްވެސް ކުލަ އަކަށް، ފިކުރަކަށް ބެލުމެއްނެތި ވެރިކަން ކުރަން އައި ބައެއްގެ ފަރާތުން ފެނުނު ވަރަށް ހުދުމުހުތާރު މަންޒަރެކެވެ. "ރަށެެއް ކުރިއަރައިގެން ދާނީ ދައުލަތުގައި ތިބޭ މީހުން ބޭނުންވާގޮތަކަށް" ކަމަށް މިނިސްޓާރ ހަލީލް ވިދާޅުވުމުން މިއޮތީ ދެން މިކަން ވަރަށް ބޮޑަށް ޔަގީންވެފައެވެ. ރައްޔިތުންނާ ދޭތެރޭ ކަންކަން ކުރައްވާނީ އެމީހުން ބޭނުންވާ ގޮތަކަށް ކަމެވެ.

ސަރުކާރުން ސައުދާގެ ކެމްޕެއިންގައި އަވަދިނެތި އުޅޭއިރު، މިނިސްޓާރ ހަލީލް މިވަނީ ސަރުކާރު ރައްޔިތުންގެ ކުރިމަތީ ބޭޒާރުކޮށްލާފައެވެ. ސަރުކާރުގެ ހަގީގީ ސިފަ މިއޮތީ ރައްޔިތުންގެ ކުރިމަތީ ހާމަޔަށެވެ.