ކޮންމެ އިންތިޚާބަކާ ދިމާކޮށް ވައުދު ގޯނި ހިފައިގެން ރައްޔިތުންގެ ކުރިމައްޗައް މިވެރިން ނިކުންނާތީވެސް ހަގީގަތުގައި ހައިރާންވެއެވެ. އެ ވައުދަކީ ތިމާ މީހާއަށް ފުއްދޭނެ ވަރުގެ ވައުދެއްތޯ ވިސްނާވެސް ނުލާ ރައްޔިތުންގެ ކުރިމައްޗައް އަރާ ވައުދާ އަހުދުތައްވެ ނިންމާލައެވެ. ރައްޔިތުންގެ ވޯޓު ލިބި އިންތިޚާބު ކާމިޔާބުވީމާ، އެެއްކަލަ ރައްޔިތުން މަތިން ހަނދާނެއް ނުހުރޭ، އެ ރައްޔިތުން ކުރިމަތީ ވެވަޑައިގެންނަވާ ވައުދުތައް ކުރިން ބުނި އެތި ކެންސަލްކޮށްލާ ގޮތައް ކޮށްލަނީ ކެންސަލެވެ.

ބޯ މަތީ މިއޮތީ އަނެއްކާވެސް އިންތިޚާބެކެވެ. އާދެ، 20 ވަނަ ރައްޔިތުންގެ މަޖިލިސް އިންތިޚާބެވެ. މި މަހުގެ 21 ވަނަ ދުވަހު އިންތިޚާބް ބާއްވަން އިލެކްޝަަން ކޮމިޝަން (އީސީން) ނިންމުމުން، ސަރުކާރު ހިންގާ ޕާޓީ އާއި އިދިކޮޅުގެ ޕާޓީ ތަކާއި، އަމިއްލަ ގޮތުން ވާދަކުރައްވާ ކެންޑިޑޭޓުން ކެމްޕެއިންގައި އަވަދިނެތި އުޅޭ މަންޒަރުތައް ފެނެއެވެ.

ރޯދަ މަސް މި ނިމެނީ މި ވެރިން ޕޯޑިއަމްތަކަށް އަރައި ދޮގު ހަދާ މަންޒަރު ބަލަ ބަލާ ތިއްބައެވެ. ކުރީގެ ރައީސް އިބްރާހިމް މުހައްމަދު ޞާލިހް ވެރިކަމުގެ 5 އަހަރު ދުއްވާލީ ރައްޔިތުން ގުނބޯ ހެދުމުގައެވެ. އެވެނި މިވެނި ކަމެއް ކޮށްދެއްވާނަމޭ، ކުޑަ ރަށެއް ބޮޑު ރަށެއް ނުބަލާނަމޭ ކިޔައިގެން އުޅުއްވިއެވެ. ރައްޔިތުންގެ ފައިސާއިން ވައްކަންތައް ކޮށް ޖީބުތައް ފުރާލީ ހިޔާލެއް ފިކުރެއްނެތިއެވެ. ބޮޑު ސަރުކާރަކާ ރައްޔިތުންގެ މަޖިލީހުގެ ސުޕާރ މެޖޯރިޓީ އޮވެގެންވެސް ރައްޔިތުންނަށް އެއްވެސް ކަމެއް ކޮށްދެވޭ ކަމަކަށް އެމްޑީޕީގެ ވެރިޔަކާއަކަށް ނުވިއެވެ. އެތައް ބަޔަކަށް އިންސާފު ހޯދައިދޭނެ ކަމަށާއި ކޮރަޕްޝަނަށް ދެއްވާނީ ޒީރޯ ޓޮަލަރެންސޭވެސް ވިދާޅުވީ މި ވެރިޔާއެވެ. ރާއްޖޭގެ މިސްރާބު ހަމަ މަގަށް އޭރުގައި ނޭޅުނު ބަޔަކު މިފަހަރު މަޖިލިސް ހޯދައިގެން އެޅޭނެހެއްޔެވެ؟

އެމްޑީޕީގެ ފަރާތުން މަޖިލީހުގައި ވާދަކުރައްވަނީ ހުސް ނުގާބިލު މީހުންނެވެ. އޭގެން އެއް މިސާލަކީ ކުރީގެ ޓުއަރިޒަމް މިނިސްޓަރ އަލީ ވަހީދެވެ. ޖިންސީ ފުރައްސާރައިގެ ތުހުމަތުތައް ކުރެވިފައިވާ އަލީ ވަހީދަށް އެމްޑީޕީގެ ޓިކެޓް ޞާލިހް މި ދިނީ މިސްރާބު ހަމަ މަގަށް އެޅުމަށްހެއްޔެވެ؟ ކާކުތޯ އޭ މިވާހަކަތައް ގަބޫލު ކުރާނީ؟

އެމްޑީޕީ އަދި ރައީސް ޞާލިހްގެ ކަންކަން މިހެން ހުރިއިރު، ދެން އަދުގެ ވެރިޔާ ވެސް މާ ރަނގަޅެއް ނޫނެވެ. ރިޔާސީ އިންތިޚާބު ކާމިޔާބު ވެސް ކުރި ބޮޑު ވައުދެއް ރައްޔިތުންގެ ކުރިމަތީ ވެގެންނެވެ. އެއީ ރައީސް އަބްދުﷲ ޔާމީން އަބްދުލްގައްޔޫމް މިނިވަން ކުރައްވާނެކަމުގެ ވައުދެވެ. އެ އިންތިޚާބުގައި އެހެން ކިޔައިގެން ރައްޔިތުންގެ ވޯޓު ހޯދައިގެން ވެރިކަން ކާމިޔާބު ކޮށްފައި ވައުދު ނުފުއްދިތާ އެ ވައުދުގެ ވާހަކަވެސް ދައްކާނުލައެވެ. މިހާެރު އަނެއްކާ މަޖިލިސް އިންތިޚާބަށް މި ކިޔަނީ ރައީސް ޔާމީން މިނިވަން ކުރީމާ އޭ ހުރިހާ ކަމެއްވެސް ރަނގަޅުވާނީ.. ދެން އަނެއްކާ ނުވީތާކަށް ރައްޔިތުންނަށް ބިރުދައްކާ މަންޒަރު މިއޮތީ ހާމަޔަށެވެ. ރަށްރަށުގައި މަޝްރޫއުތައް ކުރިޔަށް ގެންދާނީ ވޯޓު ދިނީމާއޭ، ސަރުކާރުން އެއްބާެރުލުންދޭނީ ސަރުކާރު ިކެންޑިޑޭޓް ހޮވީމާ އޭ ކިޔައިގެން ވާހަކަތައް ދައްކާތީވެސް ހިނި އާދެއެވެ.

މިކަން ކަން މިހެން ހުރި އިރު ސުވާލެއް ހިތުގައި އުފެދެއެވެ. އެއީ ސަރުކާރުގެ އިންޒާރު ތަކުގެ ވަކިން ރައްޔިތުން ވަކިވާނީ ކޮން ދުވަހަކުންބާއޭ؟